Powěsće: sobotu, 03.04.2021
Hauptinhalt
06. jutrownika 2021, 15:03 hodź.
Jutry: Lětsa jasnje mjenje křižerjow
Kelko nowačkow a jubilarow lětsa na jutrónčce w křižerskich procesionach pojěcha, njeje hišće znate. Nimale wšitcy kantorojo a nawodźa procesionow zdźělichu na naprašowanje, zo njemóža rjec, kelko jich budźe. Jasne jeničce je, zo budźe korona-pandemije a konjaceho herpesa dla lětsa wo wjele mjenje křižerjow hač w zašłych lětach - wothladajo wot loni, jako so scyła jěchało njeje. Nimo hygieniskich konceptow w konjencach móža křižerjo jeničce z negatiwnym koronowym testom jěchać. Na konjach njetrjeba so nahubnik nosyć, tola stajić ma so, hdyž křižer z konja zalěze. Pohosćenje w susodnych wosadach njeje dowolene. Časy wotjěchanja a čary procesionow su hinaše hač zwučene, zo njeby přewjele ludźi při kromach drohow stało a přihladowało.
Kulow: Křižowy puć z wosebitym digitalnym poskitkom
W Kulowje mějachu město tradicionelneho zhromadneho křižoweho puća po měsće lětsa wosebity digitalny poskitk. Zašły kónc tydźenja su při křižach QR-cody připrawili, z pomocu tutych móžachu so přisłušace teksty w interneće wotwołać. Dohromady štyri čary su so zestajeli, najdlěša je na sydom kilometrow dołha. Puće po křižach wjedu wšitke k farskej cyrkwi. Ći, kiž šmóratko nimaja, su móhli sej teksty na farskej internetowej stronje wotwołać a wučisćeć abo sej je w cyrkwi wotewzać.
Załožba: Mjenje próstwow hač loni
Za druhe połlěto 2021 je Załožba za serbski lud 36 próstwow za spěchowanje projektow dóstała. To je wosom mjenje hač loni. Próstwy so nětko internje pruwuja a doporučenja za móžne spěchowanje so přihotuja. Spočatk meje fachowa přirada za projektowe spěchowanje Załožby wo nich wuradźuje.
Zahrodnistwa: Z wobrotom jara spokojom
Zahrodnistwa su z wobrotom nalětneje pychi jara spokojom. To praji mjez druhim Čórlichec zawod w Koćinje. Tam witachu hač krótko do jutrow jasnje wjele wjace kupcow hač w zašłych lětach. Tak běchu macoški a narcisy wupředate. Tež w Pěčkec zahrodnistwje w Holešowje je naprašowanje za nalětnjej pychu njesměrnje wulke. Wosebje kropački a syrotki běchu požadane. Dla zdźěla zawrjenych twarskich wikow abo jich wobmjezowanych wotewrjenskich časow bě nawal kupcow pola zahrodnikarjow lětsa wosebje wulki.
Hornja Łužica: Wjace hač 1800 ludźi na koronu zemrěło
Na koronu je mjeztym w Hornjej Łužicy dohromady wjace hač 1.800 ludźi zemrěło. Wjace hač 150 leži tuchwilu tuteje chorosće dla w klinice. Tydźenska incidenca w Budyskim wokrjesu po ličenju RKI bě wčera pola 160, w Zhorjelskim pola 175. Poměrnje mało padow je tuchwilu na dwurěčnych hłownje katolskich wsach kaž tež w Slepjanskej kónčinje - wjace dopokazanych padow na koronu maja tuchwilu skerje we Wóspórskej a Bukečanskej kónčinje. Incidency w Hornjej Łužicy leža přirunujo z cyłej Němskej w srjedźnym polu.
