Powěsće: štwórtk, 08.04.2021
Hauptinhalt
08. jutrownika 2021, 11:28 hodź.
Korona: Aktualne informacije
W Budyskim wokrjesu bu mjeztym 14.000 wobydlerjow dwójcy přećiwo koronje šćěpjene, dalše 21.700 ludźi je dóstało znajmjeńša hižo swoju prěnju injekciju. Kaž krajnoradny zarjad w Sprjewinym měsće nimo toho zdźěli, bu wčera 39 nowych infekcijow zwěsćene. Tydźenska incidenca je so w Hornjej Łužicy porno wutorje jasnje znižiła, leži po ličenju RKI we wokrjesu Budyšin nětko pola 125,8 a w Zhorjelskim pola 145,2.
Kultura: Lěćne dźiwadło
Němsko-Serbske ludowe dźiwadło planuje lětsa premjeru lěćneho dźiwadła za štwórtk, dnja 24. junija. Kaž zdźěli zamołwita za zjawnostne dźěło, Gabriela Sušcyna, startuje 1. meje předpředań kartkow. Wšitcy, kiž su hižo loni kartku kupili, so w běhu přichodneho tydźenja z listom informuja, zo ma tiket hišće swoju płaćiwosć. Kaž Sušcyna dale informuje, su městna přihladowarjow nětko na 500 redukowane. Tež předstajenje inscenacije "Sherlock Holmes" je so na połdrahodźiny skrótšiło, za to so lětsa sezona přez sydom tydźenjow ćehnje. Klětu je potom dalši dźěl planowany. Nimo toho su tež tři gala-wječory ze Serbskim ludowym ansamblom předwidźane, składostnje 25-teje róčnicy lěćneho dźiwadła.
Bad Kötzting: Serbja z přikładom
Hygieniski koncept křižerjow dyrbi być předłoha za swjatkowniše jěchanje w Bad Kötztingu w Baworskej. Tamniši kurowy direktor a zdobom zamołwity organizator Bad Kötztingskeho swjatkowneho jěchanja je sej wot Serbow koncept wuprosył, dokelž je jutrońčku wo wuspěšnym přewjedźenju křižerskich procesionow we Łužicy zhonił. Wot 1412 je jěchanje tam w historiskich podłožkach dopokazane a słuša dźensa z něhdźe 800 jěcharjemi k najwjetšim procesionam na konju po cyłej Europje.
Digitalny swět: Wo nałožkach diskutowali
Na 70 ludźi je so srjedu na digitalnej diskusiji Konrada Adenaueroweje załožby wobdźěliło. Tema diskusijneho koła bě "Jutry a ptači kwas - serbska kultura mjez pandemiju a strachom eksistency". Referent, farar Měrćin Deleńk, wuzběhny, zo hodźa so z pomocu nałožkow, kaž na přikład přez jutrowne jěchanje a přez křižerjow, poměr a akceptanca mjez Serbami a Němcami polěpšić. Jedne z dalšich dopóznaćow wječora bě, zo słušatej serbskej gmejnje Ralbicy-Róžant a Njebjelčicy k najmłódšim w cyłej Sakskej. To dopokaza, zo su serbske wjeski najebać demografiskich a strukturnych změnow za młode swójby dale atraktiwne. To praji dalši referent, jednaćel Ludoweho nakładnistwa Domowina, Syman Pětr Cyž.
Kubšicy: Chodojtypalenje budźe
W Kubšicach smě so chodojtypalenje lětsa přewjesć. Kaž je gmejnski zarjad srjedu wozjewił, maja pak so při tym w zwisku z koronowej krizu płaćace postajenja dodźeržeć. Nimo toho dowoli so jenož jedna hromada w kóždym wjesnym dźělu a wotpalić smědźa so wone jenož dopołdnja mjez 10 a 13 hodźinami - nic wječor. Próstwy wo dowolnosć maja so hač do 19. apryla stajić.
