Powěsće: wutoru, 08.06.2021
Hauptinhalt
08. smažnika 2021, 08:50 hodź.
Berlin: Wo posedźenju parlamentariskeje přirady Załožby za serbski lud
Parlamentariska přirada Załožby za serbski lud je so póndźelu posledni króć před Zwjazkowymi wólbami zetkała a z tym tež dźěławosć zašłych štyrjoch lět bilancowała. Za předsydu přirady Marka Šimana (CDU) bě to najproduktiwniši čas swojeje dźěławosće w tutym gremiju - nic jenož, dokelž je serbska Załožba prěni raz w stawiznach wjace pjenjez dóstała, ale tež, dokelž je dožiwił přiběracu sensibelnosć za to serbske mjez Berlinskimi zapósłancami. Zamołwity za mjeńšiny pola Zwjazka Bernd Fabritius wuzběhny, zo dyrbi so serbšćina drje w swójbje dale dawać, ale zo ma stat za to prawy ramik skićeć a zo je ze spřihotowanym nowym financnym zrěčenjom za Załožbu za serbski lud baza do přichoda data.
Łužica: Reakcije na widejo "Serbskeho sejma" w syći
Předsyda Domowiny Dawid Statnik paruje pola někotrych čłonow Serbskeho sejma česćownosć druhim napřećo. Poćahuje so při tym na widejo z wurězkami digitalnych posedźenjow sejma. Dźesać mjeńšinski widejo bu zašły tydźeń po Serbach anonymnje šěrjeny. Widźeć su wurězki posedźenjow ze zdźěla raznymi a ranjacymi wuprajenjemi přećiwo Domowinje a jeje zastupjerjam. Mjeztym njeje widejo na internetowej platformy vimeo hižo wjace widźeć.
Łužica: Truskalcowa sezona zahajena
Truskalcowa sezona je so w Hornjej Łužicy zahajiła. Na polach pola Kašec, Biskopic a Großnaundorfa móža sej kupcy truskalcy sami šćipać abo hnydom w korbiku kupić. Tak steji na internetowej stronje. Na Domanic polu w Sćijecach chcedźa budku štwórtk wočinić a truskalcy předawać, zdźěli sobudźěłaćerka na naprašowanje, .
Hamor: Wodarnja dźěła na probu
Nowa wodarnja při Bjerwałdskim jězoru dźěła tuchwilu na probu. Tak pruwuja klumpy za studnje kaž tež hygieniske wobstejnosće wodowodow, zdźěli rěčnica měšćanskich zawodow Běłeje Wody. Mjeztym so dalši wutwar wodarnje dale dlije. Wona ma pak so, kaž planowane, w septembrje na syć přizamknyć. Pitnu wodu čerpa z podzemskeho přitoka Bjerwałdskeho jězora. Twar noweje wodarnje je trjeba, dokelž ma so nětčiša w Čornej Pumpje jamow dla zawrěć.
Wojerecy: Akrobaća ze złotymi medaliemi
Sportowe akrobatki Wojerowskeho towarstwa su sej při młodźinskich němskich mišterstwach w Bochumje wjacore złote medalje wudobyli. Pjeć holcow dopokaza z tym wuběrnu formu za bórzomne swětowe mišterstwa. Na nich chcedźa wot 19. junija z narodnym mustwom z dobrymi wukonami w Šwicarskim Genfje přeswědčić.
