Powěsće: wutoru, 14.09.2021
Hauptinhalt
14. požnjenca 2021, 14:32 hodź.
Chrósćicy/Janšojcy: Wólbnej forumaj Domowiny
Wjace hač 30 ludźi je so póndźelu w Chrósćicach na wólbym forumje Domowiny a Serbskich Nowin wobdźěliło. Direktni kandidaća do Zwjazkoweho sejma a dalši zastupjerjo stronow su swoje pozicije k serbskim a mjeńšinowym temam předstajili. Tak rěčachu mjez druhim wo skupinskim prawje skorženja, wo tym, kelko awtonomije bychu awtochtonym mjeńšinam připóznali a w kotrej měrje móhło Serbam pomhać, swoje prawa w Zakładnym zakonju zakótwić. Dalše temy na wječoru běchu subwencije w ratarstwje, wjelk a spěchowanske pjenjezy při strukturnej změnje. Dalši wólbny forum Domowiny a Noweho Casnika bě póndźelu w delnjołužiskich Janšojcach.
Sport: Antiserbske wuprajenja při kopańcy
Z negatiwnymi wuprajenjemi přećiwo Serbam na kromje koparskeje hry we wokrjesnej wyšej lize zaběra so nětko tež Zapadołužiski koparski zwjazk. Kaž praji jeho jednaćel Gojko Sinde na naprašowanje, njesłušeja tajke wuprajenja ani na hrajnišćo, ani do rozprawnistwa. W njedźelnišej hrě mjez LSV Hory a Sokołom Ralbicy/Hórki běchu w zjawnym livetickeru negatiwne přispomnjenja přećiwo Ralbičanskim hrajerjam čitać. Tući běchu při hrě mjezsobu serbowali. Dalše kroki sportowe sudnistwo nětko pruwuje.
Hamor: Z gmejnskeje rady
Pola Wochoz ma wulki solarny park nastać. Hamorska gmejnska rada je póndźelu nastajenje twarskeho plana za areal wobzamknyła. LEAG chce na kromje wsy 21 hektarow wulki solarny park natwarić. Su to płoniny, hdźež bě něhdy jama a kotrež so tuchwilu ratarsce wužiwaja. Wochožanska wjesna rada sej mjez druhim žada, zo maja so puće zdźeržeć a zo změje solarna připrawa dosć wotstawka k wsy.
Kulow: Karnewalowe zarjadowanja kónc lěta wotprajene
Kulowske karnewalowe towarstwo je pandemije dla za spočatk přichodneje sezony wšitke zarjadowanja na žurli wotprajiło. To potrjechi Mjezynarodne rańše piwko a kapičkowe wječory w nowembrje. Wo přewjedźenju dalšich zarjadowanjow spočatk lěta 2022 a wo klětušich póstniskich ćahach chcedźa kónc lěta wuradźować. Towarstwo přemysluje nětko město wulkich zarjadowanjow wo mjeńšich formach, kotrež postajenjam wotpowěduja.
Chrósćicy: Darja dochody za dobry skutk
Serbske młodźinske towarstwo Pawk a hudźbny kolektiw „Trio a kumple“ chcetej dźěl dochodow ze zastupnych lisćikow serbskeje popoweje opery jako podpěru organizacijam a pomocnym skutkam tak mjenowaneje měsačkoweje chorosće darić. To zdźělitej póndźelu na poslednim, šulerskim předstajenju popoweje opery „Carpe Noctem - Njeskónčna nóc“ w Chrósćicach. Chorosć bě tež tema zarjadowanja. Hudźbu chcedźa jako CD-ku a na hudźbnych platformach wozjewić. Z widejoweho materiala ma DVD-ka nastać.
Cyrkej: Ochranowske hesła wušli
Ludowe nakładnistwo Domowina a Serbske ewangelske towarstwo stej wudałoj Hesła Ochranowskeje bratrowskeje wosady na lěto 2022. Tute krótke hesła z biblije za kóždy dźeń lěta zwjazuja křesćanow na cyłym swěće, rěka w lětušim předsłowje. Prěnje hornjoserbske wudaće bě před wjace hač 20 lětami wušło. Před třomi lětami přidruži so delnjoserbske.
