Powěsće: póndźelu, 20.09.2021
Hauptinhalt
20. požnjenca 2021, 09:06 hodź.
Łaz: Pěstowarnje w nowych rukach
Štyri pěstowarnje Łazowskeje gmejny dóstanu wot lěta 2022 noweho nošerja. Nadawk přewozmje socialny zwjazk VdK Sakska. To rozsudźichu gmejnscy radźićeljo zašły tydźeń na swojim posedźenju. Na ličbje kubłarjow a popłatku, kiž dyrbja starši płaćić, pak so ničo njezměni. Potrjechene su pěstowarnje we Łazu samym, Běłym Chołmcu, Wulkich Ždźarach a Šćeńcy. Dotalny nošer, Křesćansko-socialny kubłanski skutk, bě zrěčenje z gmejnu po dźesać lětach wupowědźił.
Łužica: Zetkanje młodźiny so radźiło
Serbske młodźinske towarstwo Pawk je swój štyridnjowski seminar z młodostnymi awtochtonych mjeńšinow Němskeje zakónčiło. Póndźelu so posledni wobdźělnicy na dompuć podadźa. Mjez sydom wobdźělnikami běchu tež zastupjerjo Danskeje mjeńšiny w Němskej a Saterfrizow. Wot soboty su so młodostni z temu wokoło diskriminacije, w kotrej formje so jewi a kak jej spřećiwješ, zaběrali. Nimo sobotnišeho PowerSerba běchu wobdźělnicy njedźelu na krótkim wulěće w Delnjej Łužicy. Seminar je Pawk zhromadnje z MENS, Młodźinu europskich narodnych skupin, a z pomocu Domowiny organizowało.
Kultura: Łužiski festiwal zakónčeny
Wuměłstwowy Łužiski festiwal je so kónc tydźenja zakónčił. Na nim su so tež Serbja wobdźělili. Mjez druhim pokaza so film "Über Deutschland". Produkował bě jón Reiner Nagel. Nimo toho wobdźělištaj so w kategoriji "Spoken word" Judit a Jonas Pjetašec. Wonaj poćahowaštaj so w swojich poetiskich tekstach na problemy serbskich młodostnych we Łužicy.
Sakska Šwica: Cil dekanatneje młodźiny
Serbscy młodostni ze wšěch serbskich wosadow podachu so njedźelu na dekanatny wulět młodźiny do Sakskeje Šwicy. 75 młodostnych bě z dwěmaj busomaj po puću. Najprjedy padlowachu w gumijowych čołmach wot twjerdźizny Königsstein do směra Wehlen a po tym swjećachu zhromadny nyšpor w Pirnje z fararjom Gabrišom Nawku.
Přiroda: Hniłc pola pčołkow
Weterinarny zarjad Budyskeho wokrjesa steji Ameriskeho hniłca pola pčołkow dla w kontakće z potrjechenymi pčołarjemi. Tole zdźěli hamt na naprašowanje. Hižo spočatk septembra bě zarjad informacije wo hniłcu na za to zamołwity Institut za mrětwy sposrědkował. Weterinarny zarjad namołwja, zo měli so dalši potrjecheni pčołarjo přizjewić. Dotalne přepytowanja hišće njejsu zakónčene, w tutym tydźenju ma so tole stać.
Hórki: Zahrodnik a Bobka z medalju
Křesćan Zahrodnik je nowy wicemišter w mnohostronskim jěchanju. Hnydom za nim wudoby sej Jakub Bobka kónc tydźenja w Hórkach bronzowu medalju. Pančičanscy jěcharjo z towarstwa "Při Klóšterskej wodźe" wudobychu sej tež dalše prědnje městna. Tak na přikład Marlene Matikec z Łazka. Wona doby mnohostronske jěchanje klasy E. Britta Zahrodnikowa móžeše dresurowe pruwowanje klasy A za sebje rozsudźić a w Hórčanskim mustwowym pruwowanju stejachu Pančičanske holcy - Franciska Bobkec, Marlene Matikec, Paulina Borowitzec a Mayte Hetmankec - cyle horjeka. Najspěšniši zapřah měješe Rene Bulank ze Smjerdźaceje.
