Powěsće: srjedu, 22.09.2021
Hauptinhalt
22. požnjenca 2021, 10:48 hodź.
Hornja Łužica: Listowe wólby woblubowane
Zajim za wolenje z listom je w Hornjej Łužicy porno zašłym wólbam do Zwjazkoweho sejma přiběrał. Tak je sej w Hodźiju dotal dwójce telko ludźi podłožki za wolenje z listom skazało kaž před štyrjomi lětami. W zarjadniskim zwjazku "Při Klóšterskej wodźe", Radworju, Budestecach a Hornjej Hórce leži kwota mjez 15 a 30 procentami. To je wšudźe wjace hač 2017. W komunach z toho wuchadźeja, zo hišće wjace ludźi w přichodnych dnjach z listom woli.
Čorny Chołmc: Hłowna zhromadźizna Serbskeho kulturneho turizma
Pětr Brězan wostanje předsyda towarstwa Serbski kulturny turizm. Na hłownej zhromadźiznje póndźelu w Čornym Chołmcu bu znowa wuzwoleny. Městopředsydka je Stephanie Bierholdtec. W swojej rozprawje zhladowaše towarstwo při wšěch ćežach korony dla na wuspěšnej lěće. Tak je ličba čłonow dale rozrostła a móžachu wuspěšnje přidatne pjenjezy za projekty nawabić. Klětu planuje towarstwo, swjedźeń składnostnje swojeho 25-lětneho wobstaća nachwatać.
Bošecy: Ponowjenje šule pokročuje
W Bošecach je nowotwar zakładneje šule w hrubym hotowy. Kaž Kubšiski wjesnjanosta Olaf Reichert zdźěli, tuchwilu nowy dźěl kaž tež saněrowane stare šulske twarjenje nutřka wutwarja. Ponowić maja so tež elektrika, sanitarne připrawy a škit přećiwo harje. Kóšty za Bošečansku šulu su wo jedyn milion na 5,6 milionow eurow stupali. Ke klětušemu 125. jubilejej šule ma wšo dotwarjene być.
Choćebuz: Zhromadnje za inowaciju
W Choćebuzu su zamołwići Braniborskeje Techniskeje uniwersity, Industrijoweho parka Čorna Pumpa a města Gródk wutoru kooperaciske dojednanje podpisali. Partnerojo z wědomosće, hospodarstwa a politiki chcedźa zhromadnje inowacije spěchować a tak k pozitiwnemu wuwiću Łužicy přinošować. Tež w naležnosćach dalekubłanja ludźi a w zjawnostnym dźěle chcedźa wusko hromadźe dźěłać.
Slepo: Plany za přetwar dwórnišća
W Slepom so w zwisku z přepołoženjom železniskeje čary Běła Woda-Rěčicy tež dwórnišćo přetwari. Kaž Němska železnica zdźěli, twarja tam dwě nowej nastupišći, dotalne srjedźne nastupišćo so wotstroni. Tak móža ludźo potom bjez schodźenkow do ćaha zalězć. Hišće je projekt w fazy planowanja, 2025 maja so twarske dźěła zahajić. LEAG chce Rychwałdsku jamu dalewjesć, za to dyrbi so hač do lěta 2028 železniska čara mjez Běłej Wodu a Rěčicami přepołožić.
