Powěsće: srjedu, 12.01.2022
Hauptinhalt
12. wulkeho róžka 2022, 12:54 hodź.
Kultura: Serbski muzej zaso wotewri
Serbski muzej w Budyšinje po dwěmaj měsacomaj zaso wotewri. Wot přichodneje wutory, 18. januara, smědźa hosćo dom při Budyskim hrodźe zaso wopytać - a sej mjez druhim hač do apryla podlěšenu wustajeńcu “5x Němska po wšěm swěće” wobhladać. Wobkedźbować maja so wuměnjenja 2G-plus. Wot 15. nowembra běše muzej za wopytowarjow zawrjeny a přistajeni přewažnje w strowotniskim zarjedźe wokrjesa zasadźeni.
Rakecy: Lětuše gmejnske projekty
Rakečanska gmejna chce lětsa přichodne wulke projekty kaž energetiske saněrowanje zakładneje šule a natwar noweje gratownje wohnjoweje wobory w Stróži přihotować. Realizować móže gmejna lětsa skerje mjeńše předewzaća. Tak maja so wjacore busowe zastanišća za wužiwanje bjez barierow přetwarić. Tež někotre mjeńše dróhi a puće chce Rakečanska gmejna lětsa zwuporjedźić.
Malešecy: Wuhlady gmejny 2022
Gmejna Malešecy chce lětsa swój turistiski zhromadny projekt z Radworjom a Wulkej Dubrawu pospěšić. Z pomocu zhromadneho plana za turistiske naprawy maja so nadregionalne kolesowarske a pućowanske šćežki atraktiwniše ščinić. Kaž zdźěli Malešanski wjesnjanosta Matthias Seidel, je předwidźane, zo nastanje wjace informaciskich taflow, wotpočowanišćow za pućowacych, parkowanišćow a stacijow za nabiće w regionje.
Budyski wokrjes: Budget za čestnohamtskich
Budyski wokrjes je ze swojeho komunalneho budgeta za čestnohamtske dźěło loni towarstwa a iniciatiwy z dohromady 175.000 eurami podpěrował. 340 próstwow bě dóšło, něšto wjace hač 220 je přizwolenje dóstało. Tójšto próstwow pak dyrbješe krajnoradny zarjad wotpokazać, dokelž bě budget hižo wučerpany. Tež lětsa Budyski wokrjes zaso podpěru za wěcne kóšty čestnohamtskich projektow płaći. Próstwy za přiražki mjez 200 a 1.500 eurami móža zajimcy online zapodać.
Běła Woda: Kak dale z Ludowym domom
Přichod Ludoweho domu w Běłej Wodźe je po słowach rěčnika města dale njewěsty. Jeničce za zawěsćenje murjow je 350.000 eurow trěbne. Poskitki twarskich předewzaćow drje hižo předleža, zwotkel maja pjenjezy za to přińć, pak dotal nichtó njewě. Wo tym jedna město tuchwilu tež ze zawěsćernju, runje tak wo wysokosći sumy za nowotwar. Ludowy dom w Běłej Wodźe bě so loni w aprylu wotpalił. Hdy so sudniske jednanje přećiwo młodostnym zahaji, kotřiž su woheń po wšěm zdaću zamiškrili, njeje hišće jasne.
