Powěsće: póndźelu, 17.01.2022
Hauptinhalt
19. wulkeho róžka 2022, 09:23 hodź.
Bóšicy: Ryćer dale wjesnjanosta
Stani Ryćer wostanje wjesnjanosta gmejny Bóšicy. Po 16 lětach w tutej čestnohamtskej słužbje bu wón njedźelu na dalše sydom lět wuzwoleny. Za njeho hłosowało je 92,5 procentow wolerjow. Na wólbach wobdźěliło je so runje połojca (49,9%) wšěch wólbokmanych. Gmejna Bóšicy je z wosom wsami a ani nic 900 wobydlerjemi jedna z najmjeńšich cyłeje Sakskeje. Wšo hromadźe ma so w Budyskim wokrjesu lětsa hišće na 30 wjesnjanostow a měsćanostow wolić.
Šula: LernSax nětko tež serbsce
Wuwučowanska platforma ,,Lernsax" za šulerjow a wučerjow steji wotnětka tež w serbskej rěči k dispoziciji. Projekt zwoprawdźiło je kultusowe ministerstwo, zhromadnje z krajnym zarjadom za šule a wukubłanje a Rěčnym centrumom Witaj. Z tym ma so aktiwne nałožowanje serbšćiny přez młodostnych spěchować. Přistup je dale přez www.lernsax.de móžny a wobsahuje tež skupinu ,,Serbske šule", kotraž wuměnu mjez wšěmi serbskimi šulemi zmóžni. W Sakskej wuknje dohromady 2.900 šulerjow a šulerkow serbsce. Tuta suma je w poslednich lětach moderatnje ale konstantnje stupała.
Praha: Minister přećel Serbow
Nowy čěski minister za europske naležnosće Mikuláš Bek chce dale kontakt k Serbam dźeržeć. Wón je hižo dlěje čłon towarstwa přećelow Serbow ,,Společnost přátel Lužice" a je tež hižo Łužicu wopytał. Mikuláš Bek, kiž bu w decembrje do noweho čěskeho knježerstwa powołany, je profesor za hudźbne wědomosće a bě wot lěta 2018 hižo senator za město Brno.
Nuknica: Rezimej Jolka
24. Jolka-swjedźeń je sej na Youtube a w interaktiwnej Jolka-bróžni na 2.500 ludźi wobhladało. Lětsa wjedźeše Worklečan Marcel Hoza po programje. Tutón so přewažnje w Nukničanskej barace wotmě. Nimo toho su serbscy wobornicy přećiwo moderatorej dobyli. Wón je so sadźił, zo njebudu krótko do wohnjostroja wjace hač 8 wozydłow wohnjoweje wobory při Chróšćan Jednoće. Na kóncu bě jich 13.
Chrósćicy: Lipič wo wjelkach porěčał
W monitoringowym lěće 2020/21 zwěsćichu w Němskej 203 wjelče teritorije z něhdźe 900 wjelkami. Wosebje wjele črjódow je we wuchodnej Sakskej, ke kotrymž słušeja mjez druhim te pola Kumwałda, Róžanta, Minakała, Mułkec a Wochoz. Na to skedźbni Pawoł Lipič wot Zhorjelskeho Senckenbergoweho instituta sobotu w swojim přednošku w Chróšćanskej putniskej hospodźe. Rozprawješe wo metodach, kak so tajke a dalše daty wo wjelkach znoša. Serbski wědomostnik je z lěta 2017 na saksko-čěskim wjelčim projekće w hraničnym regionje wobdźěleny.
Budyšin: Šćěpjenski centrum přećahnył
W Budyšinje je centralna šćěpjenska stacija Němskeho čerwjeneho křiža DRK přećahnyła. Wot póndźele nješćěpi so wjace w sportowej hali na Třělnišću, ale w něhdyšim ALDIjowym wobchodźe na Drježdźanskej pódla ARAL. To zdźěli DRK. Wosoby wot 12 lět móža so tam z a bjez termina šćěpić dać. Šćěpjenska stacija je přeco wot póndźele do soboty mjez dźewjećich a pjećich wotewrjena, jenož dźensa přihotow dla hakle w jednej wočini. Dokelž zajim na šćěpjenju zaso woteběra, njetrjebaja so hižo do toho terminy knihować, informuje wokrjes Budyšin. Aktualnu incidencu za Budyski wokrjes poda RKI z 203 a za Zhorjelski wokrjes z 209.
