Powěsće: wutoru, 18.01.2022
Hauptinhalt
18. wulkeho róžka 2022, 14:13 hodź.
Budyšin: Nowej čłonaj w Załožbowej radźe
Załožbowa rada Załožby za serbski lud ma noweju čłonow. Wotnětka skutkujetaj Brigitta Faber-Schmidtowa a Jürgen Rühmann w Załožbowej radźe. Rühmann, bywši sudnik na polu zarjadnistwa a financow a dołholětny městopředsyda sakskeho wustawoweho sudnistwa, sćěhuje na Marka Dźisławka jako zastupowaceho čłona. Faber-Schmidtowa, kotraž nawjeduje wotrjad kultury w braniborskim ministerstwje za wědomosć, slědźenje a wuměłstwo, wobsadźi po rozsudźe knježerstwa druhe městno kraja Braniborskeje w Załožbowej radźe. Wosebite posedźenje Załožboweje rady ma so w měrcu wotměć.
Budyšin: Dom młodźinskeho prawa
W Budyšinje je so kónc tydźenja "Dom młodźinskeho prawa" wotewrił. Nowe zarjadnišćo ma zahe a spěšnje na kriminalitu młodostnych reagować, zdźěli Sakske ministerstwo za justicu. W "Domje młodźinskeho prawa" wobdźěłaja so w přichodźe wšě pady młodźinskeje kriminality w měsće. Zdobom móža młodostni tam wo pomoc prosyć, hdyž čuja so w nuzy. Zarjadnišćo na Dwórnišćowej w Budyšinje změje třinaće sobudźěłaćerjow, kiž su wot statneho rěčnistwa, policije a młodźinskeje sudnistwoweje pomocy.
Wojerecy: Naprašowanje wo Kinajchtskej wobjězdce
We Wojerecach je so wjace hač 400 wobydlerjow na naprašowanju k problematice, kak ma so w měšćanskim dźělu Kinajcht w přichodźe wobchad wjesć, wobdźěliło. To zdźěli rěčnica města. Nastać ma tak mjenowana "Kinajchtska wobjězdka", kotraž měła wobchad w Kinajchće změrować. Nimale dwě lěće so mjeztym warianty wobjězdki mjez Weinertowej a Nišćanskej diskutuja. Wuslědk naprašowanja w ludnosći ma so při planowanju wobkedźbować.
Budyšin: Iniciatiwa planuje ćah ze swěčkami
Iniciatiwa "Budyšin w zhromadnosći" planuje pjatk za tydźeń ćichi ćah swěčkow. Wón ma wot Tachantskeje cyrkwje po Bohatej hač k Žitnym wikam a zaso wróćo wjesć. Akcija je dźěl akcije, kotraž přewjedźe so po cyłej Němskej a kotraž ma symbol być za nadźiju a solidaritu. 28. januara 2020 bu w Němskej prěni pad korony zwěsćeny.
Korzym: Kupjel wostanje zawrjena
Wólnočasna kupjel Körsetherme w Korzymje wostanje njedźiwajcy nowych koronowych postajenjow, kiž bychu wotewrjenje dowolili, hišće zawrjena. Tam chcedźa wočaknyć wuwiće infekcijow přez omikronowu žołmu w přichodnymaj tydźenjomaj, rjekny rěčnik zaměroweho zwjazka. Kupjel zaso do słužby stajić je z wulkimi wudawkami zwjazane, a chcedźa sej wěsći być, zo njedyrbja hnydom zaso zawrěć. Druhe wólnočasne kupjele porno tomu zaso wočinja: w Krušwicy srjedu, we Wojerecach štwórtk a Trixijowa kupjel we Wulkim Šunowje sobotu.
