Powěsće: srjedu, 19.01.2022
Hauptinhalt
19. wulkeho róžka 2022, 09:22 hodź.
Domowina: Wurjadna zhromadźizna planowana
Předsydźa Domowinskich nadregionalnych towarstwow a nawodźa župow su za přewjedźenje wurjadneje hłowneje zhromadźizny Domowiny. To je wuslědk póndźelnišeho wuradźowanja z předsydu Dawidom Statnikom. Přičina je, zo buchu loni na hłownej zhromadźiznje wustawki změnjene, ale Drježdźanske hamtske sudnistwo ma při jednym dypku wobmyslenja. Dyrbja artikl konkretizować, w kotrymž dźe wo dalšich zastupnikow Domowiny w zmysle byrgarskeho zakonika. Změna jednotliweho artikla móžna njeje - wšo ma so w cyłku wothłosować. Wurjadna hłowna zhromadźizna ma so w běhu třoch měsacow zwołać, jeli sej to znajmjeńša třećina sobustawskich towarstwow žada.
Njeswačidło: Z posedźenja gmejnskeje rady
W Njeswačidle je gmejnska rada wutoru prěnje planowanje noweho dźěćaceho doma wobzamknyła. Dotal pak njeje ani hišće dorozsudźene, hdźe měło twarjenje dokładnje stać a na kotre wašnje so wone spěchuje. Wjesnjanosta Gerd Schuster mjenowaše puć k nowej Njeswačanskej pěstowarni „hišće jara kamjenjaty.“ Nimo toho njemóžeše gmejnska rada wčera žaneho noweho čłona witać. Loni nazymu běše jedyn z nich zemrěł. Wosoba, kotraž měła swobodne městno po zakonju přewzać, pak je to krótkodobnje wotpokazała.
SLA: Wubědźowanje "Młoda serbska hudźba" wuwołane
Serbski ludowy ansambl je wupisał 12. wubědźowanje "Młoda serbska hudźba". Dźěći a młodostni mjez 6 a 23 lětami su přeprošene, so wobdźělić. Požadać móža so w kategorijach spěwanje, instrument - sami abo w skupinje - a prěnjemu razej tohorunja w kategorijomaj band a reja. 31. měrca so doba požadanja skónči. Wubědźowanskej terminaj staj spočatk meje w Choćebuzu a Budyšinje. Koncert wosebje wuspěšnych wobdźělnikow budźe 22. meje w Budyšinje.
Dorost: Domowinske babyjowe woblečki su zaso tu
Domowina ma nowy serbski woblečk za ćěšenka w hornjo- a delnjoserbskej werziji. Pod hesłomaj „Mój přichod je we Łužicy”, „Mój pśichod jo we Łužycy” je předsyda Domowiny, Dawid Statnik, jón składnostnje wuradźowanja z předsydami towarstwow předstajił. Podobnu akciju je Domowina w zwisku ze stotej róčnicu załoženja třěšneho zwjazka 2012 přewjedła. Babyjowy woblečk so z informaciskimi materialijemi wo dwurěčnym kubłanju jako pakćik poskićuje.
Worklecy: Knižny projekt so na šuli zahaji
Pod hesłom "Naša serbska kniha" pokročuje Ludowe nakładnistwo Domowina srjedu ze swojim projektom za serbskich šulerjow. Nastać ma tón raz na Wyšej šuli we Worklecach hač do kónca šulskeho lěta swójska kniha ze 6. lětnikom tamnišeje šule. LND je projekt hižo na Serbskim gymnaziju w Budyšinje a na Ralbičanskej wyšej šuli přewjedł. We Worklecach zaběraja so pisacy z temu "Powěsće a legendy". Při tym dožiwja proces nastaća knihi wot spisanja manuskripta, nadźěłanja rysowankow, přez wuhotowanje hač k ćišćej a knižnej premjerje sobu.
Korona: Testowanski centrum tež w Slepom
Wot póndźele ma Slepo testowanski centrum. Kaž Lausitzer Rundschau pisa, je wón zaměstnjeny w něhdyšim twarskim dworje. Dom wužiwa so poprawom jako towarstwowe a zetkawanske městno. Testowanski centrum je wšědnje wotewrjeny, samo sobotu a njedźelu. Dotal dyrbjachu wobydlerki a wobydlerjo Slepoho do Běłeje Wody k testowanju jězdźić. Přizjewjenja njejsu w Slepom trěbne.
