Powěsće: srjedu, 26.01.2022
Hauptinhalt
27. wulkeho róžka 2022, 00:57 hodź.
Budyšin: Udo Witschas čuje so wopak rozumjeny
Wuprajenje Budyskeho zastupowaceho krajneho rady Uda Witschasa (CDU) na póndźelnišej demonstraciji, zo njebudźe Budyski krajnoradny zarjad zakazać nješćěpjenemu mediciniskemu a hladanskemu personalej wot srjedź měrca na dźěło přińć, je wutoru mnohich sakskich politikarjow rozbudźiło. Witschas sam pak čuje so wopak rozumjeny, wutoru praji. Dale zwurazni w rozmołwje z MDR-om, zo budźe so Budyski wokrjes wězo na zakonje dźeržeć a šćěpjensku winowatosć za hladanski a medicinski personal přesadźić, zo pak ma so wot srjedź měrca kóždy pad jednotliwje pruwować a po tym rozsudźić, hač móža so pod tutymi wuměnjenjemi pacienća scyła hišće zastarać.
Łužica: Namjet za nowy tekst serbskeje hymny
Maćica Serbska prosy do zjawneje diskusije wo móžnej změnje teksta serbskeje hymny "Rjana Łužica". Město linkow w druhej štučce "Ow, zo bychu z twojeho / klina wušli mužojo" móhło rěkać "Njech nam z klina twojeho / wuńdu žony, mužojo". Maćica Serbska je wutoru serbskim towarstwam namołwu k diskusiji słała. Na njej móže pak so tež kóždy jednotliwc wobdźělić.
Wojerecy: Chorownja njepušći nješćěpjenych sobudźěłaćerjow
Wojerowski klinikum "Łužiska jězorina" njebudźe swojich nješćěpjenych sobudźěłaćerjow pušćić. To praji jednaćel chorownje Mirko Papenfuß wutoru na posedźenju měšćanskeje rady. Na Wojerowskich stacijach je 80 procentow sobudźěłaćerjow šćěpjenych. Nichtó njetrjeba so bojeć, zo swoje dźěłowe městno zhubi, praji jednaćel dale. Njehladajo na to chcedźa dale pola swójskeho personala za šćěpjenja wabić.
Drježdźany: Wo serbskim wědomostnym centrumje informowałoj
Předsyda Domowiny Dawid Statnik a jednaćelka Judit Šołćina staj wutoru Sakskeho ministerskeho prezidenta Michaela Kretschmera (CDU) na dźěłowu rozmołwu zetkałoj. W njej informowaštaj jeho wo aktualnym stawje strukturneje změny w Serbach, mjez druhim wo projekće serbskeho wědomostneho centruma na Lawskich hrjebjach. Nimo toho rozmołwjachu so wo rěčnej a wo kubłanskej situaciji w dwurěčnych pěstowarnjach a serbskich šulach.
Hornja Łužica: Znački busowych zastanišćow so nadal ponowja
Wobchadnej zwjazkaj ZVON a VVO stej dotal 2.700 taflow při busowych zastanišćach wuměniłoj. To je někak třećina wšěch značkow. Tež dwurěčne tafle so ponowja. Na 250 je hižo wuměnjene - cyłkownje je jich nimale nimale 2.000 dwurěčnych značkow. Trać ma tole po słowach rěčnika VVO hišće hač do lěta 2024. Ponowjenje taflow zastanišćow płaći 7,5 milionow eurow. Kraj Sakska to z 75 procentami spěchuje.
