Powěsće: póndźelu, 20.06.2022
Hauptinhalt
20. smažnika 2022, 09:01 hodź.
Slepo: Festiwal a jubilejny swjedźeń
Zakónčacej wjerškaj 9. Mjezynarodneho festiwala dudakow a 750. jubileja Slepoho běštej njedźelu swjedźenske kemše a swjedźenski ćah po wsy. Dopołdniše kemše swjećeše predikant Manfred Hermaš w šěsć rěčach. Na ćahu bě 750 wobdźělnikow. Předstajichu Slepjanske gmejnske a cyrkwinske žiwjenje, kubłanje dźěćiny a dźěło towarstwow. Wo hudźbne wobrubjenje su so postarali Slepjanski folklorny ansambl kaž tež dudakowe skupiny z Estniskeje, Mallorci, Pólskeje, Čěskeje a Němskeje. Dohromady móžachu na swjedźenju 6.000 hosći witać.
Hornja Łužica: Wjace dźiwich swini třěleć
Sakske ministerstwo za socialne a Krajny zwjazk hońtwjerjow stej sobotu zahajiłoj projekt za rozšěrjenje hońtwy dźiwich swini. Zaměr je, populaciju redukować, zo njeby so afriska swinjaca mrětwa hižo tak rozpřestrěwać móhła. Zwjazk hońtwjerjow planuje w restrikciskich conach w Hornjej Łužicy hač do klětušeho nalěća na 60 hońtwow. Za to su w něhdyšej dróhomištrowni w Kamjencu zaměstnili centralu za organizaciju.
Pančicy-Kukow: Klóšterski a swójbny swjedźeń
W klóštrje Marijina hwězda w Pančicach-Kukowje bě njedźelu Klóšterski a swójbny swjedźeń Budyskeho wokrjesa. Kaž zdźěli Sakski krajny kuratorij, móžachu tam někak 2.000 wopytowarjow witać. 50 wikowarjow je swoje twory poskićało a wjace hač 20 towarstwow z wokrjesa so předstaji. Po swjedźenskich kemšach bě na klósterskim dworje pisany kulturny program.
Budyšin: Poetry slam a serbski rap
Na 120 ludźi je na sobotnišim zarjadowanju LITaPOP w Budyšinje sobotu hnydom dwě premjerje dožiwiło. W prěnim dźělu měješe zběrka młodych serbskich pisacych, Paternoster 9, swoju premjeru. Pjeć młodych serbskich awtorow předstaji swoje teksty. Po tym je hudźbna skupina Nowa Doba prezentowała swoje nowe rapowe spěwy. Serbski ludowy ansambl a Ludowe nakładnistwo Domowina běštej na zarjadowanje přeprosyłoj.
Choćebuz: 13. Serbski swjedźeń w měsće
Moderna serbska hudźba, folk, popowa hudźba a starosłowjanske zynki su sobotu na 13. Serbskim swjedźenju w Choćebuzu zaklinčili. Kokołowokoło swjedźenišća předstajichu so mjez druhim Serbska kulturna informacija Lodka, Ludowe nakładnistwo Domowina, zastupjerjo Serbskeho sejma kaž tež towarstwo k spěchowanju serbskeje rěče w cyrkwi.
