Powěsće: pjatk, 24.06.2022
Hauptinhalt
24. smažnika 2022, 09:55 hodź.
Berlin: Domowina zamołwitu Zwjazkoweho knježerstwa za narodne mjeńšiny wopytała
Němsko-serbske tafle na awtodróhach we Łužicy a runostajenje žónskich swójbnych mjenow móhli so hišće w tutej legislaturnej periodźe Němskeho knježerstwa přesadźić. To je zaćišć předsydy Domowiny Dawida Statnika a jednaćelki Judit Šołćineje po prěnim zetkanju z nowej zamołwitej za narodne mjeńšiny, Natalie Pawlik, štwórtk w Berlinje. Wona je přewšo wotewrjena za situaciju Serbow a chce prawje bórze Łužicu wopytać.
Hornja Łužica: Započeli žito młóćić
Na wjacorych hornjołužiskich polach su wšelake ratarske zawody započeli žito młóćić. Swoje žně zahajiła je mjezdruhim Sorabia pola Sernjan. Tam je 20 hektarow zymskeho ječmjenja młóćiła. Z kwalitu je šef Sorabije Matej Korjeńk dosć spokojom - wosebje, dokelž njebě z tym ličił. Tež Zdźěrjanski ratarski zawod je hižo ze žnjemi započał, je pak po 100 hektarach přestał, dokelž je drje žito suche, ale njeje hišće dozrawjene. Budissa kaž tež Kulowske agrarne drustwo zahaji swoje žně ječmjenja přichodny tydźeń, štož je pak tež zašo hač zašłe lěta. Jenož 2018, jako bě hišće bóle sucho hač lětsa, su ratarske zawody hišće zašo dyrbjeli žně zahajić.
Hospodarstwo: Milinarni so přihotujetej
W milinarni w Janšojach so zaso dwaj 500 megawatowej blokaj za wužiwanje přihotujetej. Kaž zdźěli energijowy koncern LEAG, stej připrawje tuchwilu w tak mjenowanym wěstotnym modusu. To woznamjenja, zo započinatej dźěłać, hdyž knježi nuzowy pad při zastaranju z energiju. Přidatny personal so tuchwilu přistaja. Po dotalnych planach dyrbještej so blokaj poprawom w nazymje 2022 a 2023 doskónčnje wotšaltować. W milinarnjomaj w Čornej Pumpje a w Hamorje LEAG tajke kročele dotal njeplanuje.
Budyšin: Premjera lěćneho dźiwadła
Na wupředatej premjerje zahajištaj štwórtk krajny rada Michael Harig a měšćanosta Alexander Ahrens 26. Budyske lěćne dźiwadło. Na 1000 přihladowarjow dožiwi tři hodźinsku kekliju wokoło detektiwa Sherlocka Holmsa z 40 sobuskutkowacymi. Hač do 31. julija maja hišće cyłkownje 34 předstajenjow na Budyskim hrodźe.
Ralbicy-Róžant: Planowanja za nowotwar pěstowarnje so zahaja
W gmejnje Ralbicy-Róžant móža so planowanja za nowotwar pěstowarnje a přetwar nětčišeho twarjenja na hort zahajić. Wotpowědny nadawk za zhotowjenje zrěčenjow z planowanskim běrowom za wysokotwar a techniskeho wuhotowanja domu je tamniša gmejnska rada štwórtk přizwoliła. Klětu móhli w meji z twarom započeć a 2024 nowy domicil na dźěći gmejny přepodać. Cyłkownje ma projekt milion wjace, a z tym někak 8,3 miliony eurow płaćić.
Stražnice: Folklorny festiwal
W čěskich Stražnicach je so štwórtk Mjezynarodny folklorny festiwal zahajił a tež Serbja so na nim lětsa prezentuja. Sobotu změja temowy wječor pod hesłom "Za čěskimi horami". Tam dožiwi wopytowarstwo prěni zhromadny program skupiny "Lidova muzika z Chrastu" a Serbskeho folklorneho ansambla Wudwor. Tež Přezpólni, Serbska rejowanska skupina Smjerdźaca, Sprjewjan a kapała Serbska reja so w dźiwadle předstaja. W nocy je so tež hižo wulki bus ze Serbami do Čěskeje podał.
