Powěšće: póndźelu, 27.06.2022
Hauptinhalt
27. smažnika 2022, 10:27 hodź.
Korutanska/Hornja Łužica: Europeada - Serbja 1. hru dobyli
Serbske mustwo je na Europeadźe w Korutanskej 4:0 přećiwo mustwu FC Lusern mjeńšiny Cimbrow z Italskeje dobyło. Serbja nawjedowachu hižo po 45 mjeńšinach z 2:0. Dalše dwoje wrota padnychu w druhim połčasu. Danny Kobelt bě prěnje wrota za Łužiskich třělił. Dwoje dalše šmórny Jan Bogusz do saka. A posledne poradźichu so Christianej Rinze. Na public viewingu w Radworju je sej hru 50 ludźi wobhladało, we Wotrowje 25. Dźensa hraja Serbja na mustwo FC Pomak z Bołharskeje, Livestream namakaće na našich stronach w syći a w app MDR .
Stražnicy: Wjac hač 100 Serbow na folklornym festiwalu
Wšelake serbske folklorne skupiny su kónc tydźenja w čěskich Stražnicach na tamnišim Mjezynarodnym folklornym festiwalu stotki hosći zahorili. Za dwuhodźinski pisany program su Serbski folklorny ansambl Wudwor, Serbska rejowanska skupina Smjerdźaca, skupina Sprjewjan, Serbska reja, Přezpólni a Lidova muzika z Chrastu wulki přiklesk žnjeli. Hesło wječora rěkaše "Za čěskimi horami".
Wotrow: Wosadny swjedźeń swjećili
Wot štwórtka hač do wčerawšeje njedźele woswjećichu Wotrowscy 250-lětne wobstaće swojeje wosady. Najebać wysokich temperaturow sobotu a njedźelu přichwatachu sta hosćo z wokolnych wosadow na pisany program. Nimo hudźbnych poskitkow kaž koncert chóra Lipy, dujerskeje kapały Horjany a skupinow Wusmuž a Holaski běše swjedźenski ćah ze 24 wobrazami wčera popołdnju wjeršk swjedźenskeho kónca tydźenja. Tole bilancujetaj Felix Buck wot młodźinskeho kluba a Klawdija Wjacławkowa z organizaciskeho wuběrka.
Budyšin: Bilanca Kulturneje zahrody
Wothłós na koncerty Kulturneje zahrody w Budyskim Sundowneru bě rozdźělny. Někotre ze dźesać koncertow běchu dosć derje wopytane, druhe skerje nic. Přiwšěm je Serbski ludowy ansambl jako zarjadowar jara spokojom a chce klětu projekt znowa přewjesć. Lětsa bě tomu prěni króć, zo poskićachu so koncerty najwšelakorišich stilow pod hołym njebjom w Budyskej Byrgarskej zahrodźe. Poprawom bě 12 zarjadowanjow planowane. Dešća dla so dwaj koncertaj, kotrejž dyrbještaj minjeny kónc tydźenja być, přesunyštaj.
Radwor: Twarja turistiske parkowanišćo při kěrchowje
W Radworju su so twarske dźěła za nowe turistiske parkowanišćo při tamnišim kěrchowje zahajili. Tam twarja 20 městnow za parkowanje, mjez druhim tež za nabiwanje elektriskich awtow a kolesow. Dale ma tafla wo najwoblubowanišich kolesowarskich pućach a turistiskich poskitkach w gmejnje informować. Hač do kónc nazymy ma turistiske parkowanišćo hotowe być. Wone płaći cyłkownje 95.000 eurow, wot kotrychž so třištwórćny spěchuja, tak Radworska wjesnjanostka Madlen Rentschowa.
