Powěsće: wutoru, 28.06.2022


Korutanska: Serbske mustwo znowa dobyło

Serbske mustwo wudoby sej z póndźelnišej hru najlěpše šansy na štwórćfinale. Z 11:1 dobychu nad mustwom Pomakow z Bołharskeje. Je to dotal najwyše dobyće pola muži Europeady. Wjace hač 60 fanow z Łužicy serbske mustwo pohonjowaše. Při temperaturach wokoło 33 stopjenjow dopokazachu Łužiscy koparjo dobru kondiciju. Při hrě dźensa, wutoru, přećiwo Romam z Madźarskeje so rozsudźi, hač budu prěni w swojej skupinje.


Łužica: Měšana bilanca hromakoweje sezony

Za najwjace producentow hromaka w Hornjej Łužicy je bilanca lětušeje sezony měšana. To wuda naprašowanje pola wjacorych agrarnych zawodow. Hačrunjež bě kwalita lětsa jara dobra, je so mjenje kupowało, rjekny na přikład plahowar hromaka Matthias Domanja z Hózka. Při wšěm je tola wšitko na kóncu wotbył - dokelž je za mjenje pjenjez předać dyrbjał, a dokelž su jemu zdruha domjacy gastronomojo swěru dźerželi.


Budyšin: Wobchowanje serbskich rěčnych rumow

Japanski rěčespytnik Goro Christoph Kimura přepytuje strategije wobchowanja a tworjenja serbskorěčnych rumow w přitomnosći němskorěčnych. Projekt je póndźelu na zjawnym přednošku Serbskeho instituta w Budyšinje předstajił. Serbja tajke strategije dawno nałožuja, tak Kimura. Wuslědki jeho slědźenja pak móhli pomhać, sej to bóle wuwědomić. Tak bychu Serbja swoju maćeršćinu tež w přitomnosći němskorěčnych bóle wužiwać móhli.


Slepo: Suchota a mało wody w Srjedźnej Łužicy

W zašłych lětach bě w gmejnach Slepo, Trjebin a Dźěwin přewšo sucho. Staw dnoweje wody je so na wjele městnach znižił. To je wuslědk wodoweho monitoringa mjez lětami 2017 a 2021, kiž je so póndźelu w Slepom předstajił. Kaž w rozprawje rěka, bě wodowa bilanca wosebje wot 2018 přewažnje negatiwna, wudymi so potajkim wjace wody hač so nadešćowa. W ekologisce škitanych pasmach pak je situacija najebać to dobra, dokelž je energijowy koncern LEAG z wodu zastaruje. Wodowy monitoring so wudobywanja brunicy dla prawidłownje w kónčinje přewjedźe.


Zhorjelc: Wobraz Hanki Krawcec před sudnistwom

Krajne sudnistwo Zhorjelc je póndźelu rozsudźiło, zo njesmě hornjołužiski modowy label LABA t-shirt z wobrazom serbskeje wuměłče Hanki Krawcec předawać. Na t-shirće měješe so portrej młodeje žony pokazać, kiž bu jako linolejowa mólba wot Krawcec 1974 stworjeny a kiž bu hižo w knižnych publikacijach wozjewjeny. Wo koho so jedna, w zjawnosći znate njeje. Wosoba abo wosoby, kotrež maja prawo na tutym wobrazu, su přećiwo jeho wužiwanju na t-shirtach skoržili. Hač modowy label so nětko na přichodnu instancu, na wyše krajne sudnistwo wobroći, chce hišće rozsudźić. Jemu dźe wo to, wujasnić poměr mjez prawom na swójskim wobrazu a wuměłskej swobodu.


Budyšin/Polevsko: Prěnja jězba k čěskim šulerjam

Na dźensnišej wutorje podadźa so šulerjo Serbskeje zakładneje šule Budyšin prěni króć do partnerskeje šule do Polevska w Libereckim kraju. W zhromadnym projekće, kiž hižo někotre tydźenje traje, pokazaja dźěći mjez 7 a 12 lětami na zhromadnosće a rozdźěle w regionomaj Łužiskich horin na čěskej stronje a Hornjej Łužicu. Podpěru za hranicu překročacy projekt dóstanjetej šuli wot Němsko-čěskeho fondsa přichoda a fondsa SiMUL+ "Čiń sobu" Sakskeho statneho ministerstwa za regionalne wuwiće.