Powěsće: pjatk, 01.07.2022
Hauptinhalt
01. pražnika 2022, 12:13 hodź.
Wobsah artikla:
- Europeada: Serbja połfinale docpěli
- Budyšin: Dowolnosć Zwjazka k dočasnemu zahajenju strukturnych projektow
- Budyšin/Norwegska: NSLDź wobdźěli so na mjezynarodnym mjeńšinowym dźiwadłowym projekće
- Hornja Łužica: Dźěłowe wiki wostanu stabilne
- Bukecy: Swjeća swoju 800. róčnicu
- Njeswačidło: 1. zetkanje towarstwa po pandemiji
Europeada: Serbja połfinale docpěli
Serbske mustwo je połfinale Europeady docpěło. Z dobyćom nad mustwom Chorwatow ze Serbiskeje docpěchu prěni raz w stawiznach Europeady połfinale. Hra skónči so 3:1 za Serbow, wšě tři wrota třěli Křesćan Rinza. Z tym je wón dotal najwuspěšniši nadběhowar a třělc wrotow Europady. Dźensa, pjatk nawječor pjećich, hraje serbske mustwo přećiwo hosćićelam, Korutanskim Słowjeńcam.
Budyšin: Dowolnosć Zwjazka k dočasnemu zahajenju strukturnych projektow
Wot pjatka, 1.julija, móža so prěnje serbske strukturne projekty w Sakskej a Braniborskej započeć. Kaž informuje Załožba za serbski lud, kotraž tež tute spěchowanske pjenjezy wobhospodarja, je dowolnosć Zwjazka k dočasnemu zahajenju dóšła. Za Saksku je Rada Załožby dotal tři projekty přizwoliła: "Serbske Medije Inowacija", "Serbski eksperiMINT Campus w Radworju" a syć regionalneho managementa nastupajo identity a rěče. Hač do 30. septembra móža so pola Załožby dalše próstwy stajić. Zakład je, zo je tež serbska rěč a kultura ze strukturnych srědkow spěchujomna.
Budyšin/Norwegska: NSLDź wobdźěli so na mjezynarodnym mjeńšinowym dźiwadłowym projekće
Němsko-Serbske ludowe dźiwadło wobdźěli so tutón kónc tydźenja na mjezynarodnym dźiwadłowym projekće w sewjernej Norwegskej. Madlenka Šołćic tam Budyske dźiwadło zastupuje. Wosom dźiwadłow z cyłeje Europy dźěła při tym na wjacore měsacy trajacym projekće z mjenom "phōnē -mjeńšinowym hłosam rěč dać". Na kóncu ma wosom načasnych hrow nastać, kiž so z mjeńšinami zaběraja. Dwě uniwersiće projekt wědomostnje přewodźujetej, jedna z njeju je Lipšćanska. Klětu w juniju je k tomu konferenca w Budyšinje planowana.
Hornja Łužica: Dźěłowe wiki wostanu stabilne
Ličba bjezdźěłnych w Hornjej Łužicy je tež w juniju zlochka spadnyła. Tuchwilu je 16.200 ludźi bjez płaćeneho dźěła - to je 0,9 procentow mjenje hač w meji a dobrych 9 procentow mjenje hač před lětom. Aktualna kwota bjezdźěłnosće leži pola 5,9 procentow. Fachowi přistajeni za regionalne hospodarstwo su dale mócnje požadani, rjekny jednaćelka Budyskeje dźěłoweje agentury, Kathrin Groschwald.
Bukecy: Swjeća swoju 800. róčnicu
Z koncertom a rejemi na wjesnej žurli zahaji so na dźensnišim pjatku w Bukecach swjedźenski kónc tydźenja k 800. róčnicy prěnjeho naspomnjenja wsy. Sobotu wotměje so potom na tamnišim farskim dworje serbski dwórski swjedźeń. Tam chce před krótkim wožiwjena drastowa skupina serbsku narodnu drastu z Budyskeho kraja pokazać. Za njedźelu su dalše zarjadowanja planowane. Najwjetši dźěl wudawkow za jubilej we wysokosći 50.000 eurow zapłaći gmejna sama.
Njeswačidło: 1. zetkanje towarstwa po pandemiji
Wo 450lětnych stawiznach Lišeje Hory pola Njeswačidła přednošowaše štwórtk publicist Manfred Laduš před wjace hač 30 wopytowarjemi, połojca z nich běchu Serbja. Bě to prěnje zarjadowanje "Towarstwa přećelow kultury a domizny" w Njeswačidle po pandemiji. W 1572 prěni króć naspomnjenej wjesce bydleše w 19. lětstotku hišće 30 Serbow w 5 statokach, dźensa su to hišće třo. Liša Hora je wosebje přez katownju a kata Gundermanna a přez ludowu powěsć wo Krabaće znata.
