Powěsće: wutoru, 16.01.2024
Hauptinhalt
17. wulkeho róžka 2024, 09:51 hodź.
Ralbicy-Róžant: Wuhlady gmejny za lěto
W gmejnje Ralbicy-Róžant su loni započeli nowu pěstowarnju w Ralbicach twarić. Jedyn z wjacorych nadawkow gmejny lětsa je dotwar wulkoprojekta, kaž praji wjesnjanosta Hubertus Ryćer: "Je předwidźane, zo so pěstowarnja kónc lěta do proby přewza a tež žłobik ze Smjerdźaceje do pěstowarnje přećehnje. Nimo toho su potom małe wěcy, pućotwar na kóždy pad. To chcemy někotre puće ponowjeć. Tam pak wokomiknje z planowanskim běrowom jednamy, damy studiju činić, kotre puće móža so ponowić. Potom wutwar hrjebjow, tak zo woda wotběži. To je planowane, tam tež wokomiknje studija běži přez planowanski běrow." Kotre wotrězki hrjebjow to potrjechi, ma so w běhu lěta postajić.
Budyšin: Serbske młodźinske towarstwo Pawk 2024
Jutrowny seminar w Budyšinje je lětsa wjeršk Serbskeho młodźinskeho towarstwa Pawk, tak praji předsyda Lukaš Pečak. Zhromadnje z MENS, Młodźinu europskich narodnych skupinow, organizuja najwjetše zetkanje ze 60 młodostnymi z narodnych mjeńšinow w Sprjewinym měsće. Pod hesłom "Budź sej swojich prawow wědomy" njezaběraja so jenož z mjeńšinowej politiku, ale zeznaja zdobom tež Hornju a Delnju Łužicu. Zdobom woswjeći Serbske młodźinske towarstwo Pawk lětsa swój 30. jubilej wobstaća.
Wojerecy: Twarske projekty při Šibojskim jězoru
Město Wojerecy přihotuje dalše twarske dźěła za polěpšenje turistiskich poskitkow při Šibojskim jězoru. Kaž měšćanski zarjad zdźěli, maja so za to hišće do nalěća štomy pušćić, zo bychu tam pozdźišo mjez druhim puće k jězorej a wuhladnu wěžu natwarić móhli. Sanitarne twarjenje při jězoru ma do kupanskeje sezony spočatk meje hotowe być.
Kulow: Wolejbulowy turněr
Wólnočasne wolejbulowe mustwo Sportoweho towarstwa 1922 Radwor je póndźelu w Kulowje Ptačokwasny turněr dobyło. Na dalšimaj městnomaj sćěhowachu hosćićel Žołto-módri Kulow a šěstka wučerjow Serbskeho gymnazija Budyšin. Dobyćerski pokal bě lětsa wulki kołp k jědźi, kotryž bě sobudźěłaćerka Kulowskeje konditarnje zhotowiła. Witanje, připowědźenje hrow a tež mytowanje na turněrje běchu w serbskej rěči.
Komorow: Prof. Helmut Faska njebohi
Rěčespytnik prof. dr. Helmut Faska je njebohi. Wón je póndźelu w starobje 91 lět we Wojerecach zemrěł. Po 2. Swětowej wójnje słušeše prof. Faska k tak mjenowanej Varnsdorfskej generaciji, kotraž chodźeše w Čěskej na gymnazij. Po studiju sorabistiki a rěčespyta w Lipsku a Moskwje běše wón wot 1966 nawoda rěčespytneho wotrjada Budyskeho Instituta za serbski ludospyt. Jako załoženski direktor noweho Serbskeho instituta woteda wón 1992 funkciju a wěnowaše so slědźerskemu dźěłu. Lawreat myta Ćišinskeho – 1984 spožči so jemu myto 2. rjada – zdoby sej z mnohimi wudaćemi wo serbskej gramatice nahladnosć jako rěčespytnik. 2006 bu prof. Faska z Mytom Domowiny počesćeny.
