Powěsće: wutoru, 19.03.2024
Hauptinhalt
19. nalětnika 2024, 08:30 hodź.
Lipsk: Hornjołužiske nakładnistwa na knižnych wikach 2024
Krótko do zahajenja knižnych wikow w Lipsku je wčera trójka Hornjołužiskich nakładnistwow nowostki prezentowała. Biografiski roman, kiž žiwjenje Serba Johanna Zauty w 19. lětstotku rysuje, předstaji Zhorjelski nakładnik Gunter Oettel. Ludowe nakładnistwo Domowina pojědźe mjez druhim z němskorěčnej antologiju prozy "Wie ein Mittelpunkt entsteht" na wiki. Kamjenski Muzej zapadna Łužica změje nowostku wo rubježnych ptakach sobu, kotraž wuńdźe w zwisku z nowej wustajeńcu.
Łužiska jězorina: Tamniši zwjazk informuje
Łódźnistwo za Łužisku jězorinu ma so po cyłej Europje wupisać. To je zaměrowy zwjazk Łužiskeje jězoriny na swojim zašłym posedźenju wobzamknył. Při tym dźěłataj sakski a braniborski zaměrowy zwjazk zhromadnje na wupisanju. Najpozdźišo 2026 chcedźa zamołwići zaso tury z wjacorymi łódźemi po Łužiskej jězorinje poskićić. Tež na Bjerwałdskim jězorje chce zaměrowy zwjazk pozdźišo jězby z łódźu zmóžnić.
Hola a haty: Informacije nětko tež serbsce
Digitalne informacije ke krajinje Hornjołužiske haty a hola předleža nětko tež hornjoserbsce. Internetowa strona projekta MoSaiKTeil - Łužiske bahna, pěsk, chójny a haty - ma kompletnje hornjoserbsku wersiju. Tam móža zajimcy wo biologiskej mnohotnosći regiona a přirodoškitnych naprawach čitać. Wobšěrne serbske wudaće bu móžne přez angažowanu přełožowarku a spěchowanje přez Załožbu za serbski lud, zdźěli wčera projektne mustwo. Wone chce zwjazanosć mjez přirodu a kulturu sylnić. Projekt MoSaiKTeil zaběra so z nowymi přistupami k wuwiwanju regiona a spěchuje so přez Zwjazkowy program.
Wjesel pola Radworja: Bróžnja so wotpaliła
We Wjeselu, wjesnym dźělu Radworja, je so njedźelu popołdnju bróžnja dospołnje wotpaliła. Nasta škoda štwórć miliona eurow. Nimale 80 wohnjowych wobornikow zadźěwachu tomu, zo płomjenja na bydlenski dom přeskočichu. Woheń skóncowa tež wjacore mopedy, motorske a ratarske mašiny. 54-lětny wobydler statoka bu přez kurowy płun lochko zranjeny. Přičina wohenja njeje hišće znata.
Budyšin: Zwučuja při Spjatym jězoru
Wohnjowa wobora Budyšin chce dźensa za chutny pad při Budyskim spjatym jězoru trenować. Kaž zdźěli měsćanski zarjad, chcedźa wot ranja hač do wječora zhromadnje z DRF wuchowarjemi z powětra zwučować, kak so tepjacych ludźi ze spjateho jězora wuchowaja. Za to so specialisća wohnjoweje wobory z wuchowanskeho helikoptera dele pušća, so tepjacych přijimuja, a jich na kraj transportuja. Woprawdźite wohroženje njewobsteji.
Slepjanska wosada: Poslednja nošerka Slepjanskeje drasty
Na dźensnišej wutorje pochowa so w Brězowce w Slepjanskej wosadźe Hanka Kowaloc, kiž je 7. měrca w starobje 98 lět zemrěła. Wona bě poslednja žona Slepjanskeje wosady, kotraž je z dźěćatstwa hač do smjerće wšědnje Slepjansku drastu nosyła. Z jeje smjerću so lětstotki dołha tradicija w Slepjanskej wosadźe pozhubi.
