Powěsće: póndźelu, 18.03.2024
Hauptinhalt
19. nalětnika 2024, 08:56 hodź.
Slepo: Rezimej jutrownych wikow
Nimale 4.000 wopytowarjow poby kónc tydźenja na 25. jutrownych wikach w Slepom. Organizatorojo njeskićichu hosćom jenož tradiciju debjenja jutrownych jejkow w znatych technikach, ale tež mjeńše kulturne programy kaž tež burske a rjemjeslniske wiki. Nimo toho bu w Serbskej kulturnej informaciji wotewrjena fotowa wustajeńca z motiwami Slepjanskeje narodneje drasty. - Serbski muzej w Budyšinje je wčera swoju kóždolětnu wustajeńcu ,,Jutry w Serbach" wotewrił. W tutej wěnuje so nałožkam a tradicijam Serbow wot zeleneho štwórtka hač k jutrońčce.
Praha: Towarstwo Přećelow Serbow so schadźowało
Towarstwo Přećelow Serbow je so sobotu w Praze k swojej hłownej zhromadźiznje schadźowało. Dr. Katja Brankačkec a dr. Michal Škrabal staj předstajiłoj mjezystaw projekta noweho hornjołužisko-čěskeho online słownika "MUDRA 2.0". Na oficialnej stronje so tuchwilu hišće dźěła. Dr. Petr Kalina je přitomnym, 35 čłonkam a čłonam towarstwa, wo swojej nowej monografiji wo serbskich huslach rozprawjał.
Róžant: Swójbne putnikowanje
Njedźelniše putnikowanje swójbow do Róžanta steješe pod hesłom „Štož syješ, to žněješ“. Přewažnje starši z dźěćimi ze serbskich katolskich wosadow běchu do Róžanta přišli. Chróšćanska šola kemše wobrubi. Farar Tomaš Dawidowski prědowaše w połnje wobsadźenej cyrkwi wo tym, zo je zhromadny čas w swójbje wjetše bohatstwo hač někajkežkuli materielne wobsydstwo a, zo měli sej wosadni swójbne žiwjenje česćić. Na kóncu dóstachu wšitcy putnicy symješko słónčneje róže.
Budyšin: Literarna dźěłarnička
Pjeć aktiwnych pisacych je so sobotu w Budyskim Serbskim domje na cyłodnjowskej literarnej dźěłarničce wobdźěliło. Lubina a Dušan Hajduk-Veljković rozjimaštaj jim žanr „słuchohry za dźěći“. Wo twórbach wobdźělnikow so diskutowaše a na nich so dźěłaše. W nazymje ma so dalša dźěłarnička w nošerstwje Załožby za serbski lud přewjesć.
Pančicy-Kukow: Sportowe towarstwo so schadźowało
Sportowe towarstwo Marijina hwězda w Pančicach-Kukowje je na swojej hłownej zhromadźiznje Handrija Bjedricha jako předsydu cyłka wobkrućiło. Lukas Kubica je zastupowacy předsyda a Susanne Kubicec pokładnica. Nimo toho zaběrachu so čłonki a čłonojo z trawnikom sportnišća, kiž ma so saněrować. W tutym zwisku diskutowachu zdobom tež wo wurunanskich płaćenjach za čas dźěłowych zasadźenjow.
