Powěsće: sobotu, 16.03.2024
Hauptinhalt
19. nalětnika 2024, 09:02 hodź.
Chrósćicy: Dźěłarnička nawjedowacych serbskich hortow
W Chrósćicach zeńdźechu so štwórtk nawjedowacy a kubłarjo šěsć serbskich hortow k dźěłarničce z temu „Sylnjenje horta jako serbskorěčny kubłanski rum ruku w ruce ze zakładnej šulu“. Z njej zahaji so proces, kotryž ma k polěpšenju kooperaciskeho dźěła mjez hortami a zakładnymi šulemi wjesć. Dźěłarničku běchu Rěčny centrum WITAJ, Křesćansko-socialny kubłanski skutk a Serbske šulske towarstwo zhromadnje přihotowali. Dalše tajke zarjadowanja, tež z wučerjemi, su předwidźane.
Róžant: Wjesne towarstwo załožili
Nowe wjesne towarstwo w Róžeńće rěka “Při studničce” Róžant z.t. Na to dojednachu so wjesnjanki a wjesnjenjo pjatk wječor na załoženskej zhromadźiznje. Jednohłósnje do předsydstwa wuzwolichu Róžeńčanki a Róžeńčenjo Tomaša Šołtu jako předsydu, Miju-Katarinu Hrjehorjec a Tomaša Glawša jako městopředsydku a městopředsydu, Nicole Hrjehorjowu jako pokładnicu a Hilžu Mittagowu jako pisarku.
Plusnikecy: Zarjad wo dróze k skale
W zwadźe wo wutwar dróhi k skale w Plusnikecach dale žane rozrisanje wotwidźeć njeje. Wyši hórnistwowy zarjad je nětko wo napřećiwnymaj próstwomaj rozsudźił: Firma ProStein chcyše w dowolnosći za skału z lěta 1998 postajenje šmórnyć dać, zo ma wobhospodar skały dróhu w běhu dweju lět wutwarić. Malešanska gmejna sej porno tomu žadaše, zo zarjad firmu nuzuje, dróhu wutwarić. Wobě próstwje je zarjad wotpokazał. Gmejna chce znapřećiwjenje zapodać, tak wjesnjanosta Matthias Seidel. Firma ProStein hišće wo přichodnych krokach rozsudźiła njeje. Kaž jednaćel zdźěli, pak maja zrozumjenje za to, zo špatny staw dróhi wobydlerjow myli a přeja sej tohorunja rozrisanje problema.
Wubědźowanja: Wuslědki kartyplacarjow
Dobyćer 3. Serbskeho Grandprixa 2024 w dwójnej hłójčce je Hermann Woko z Hrańcy. Z cyłkownje 37 dypkami přesadźi so wón před Volkmarom Šołtu a Janom Zahonom. Na třećimaj městnomaj slědujetaj Mathias Schneider a Maćij Šnabl. Dohromady wobdźěli so na wšěch sydom stacijach lětušeho turněra 251 hrajerjow. Tak běchu w minjenych tydźenjach na přikład w Pěskecach, Smječkecach, Konjecach abo w Hórkach karty placali.
Přirodoškit: Dalše płoty za amfibije natwarili
W Biosferowym rezerwaće Hornjołužiska hola a haty su sobudźěłaćerjo mjeztym dalše płoty podłu dróhow za amfibije natwarili. Kaž zdźěla zamołwići w nowinskej zdźělence, steji škitny płót mjez Stróžu a Lemišowom. Přirodoškitna stacija w Njeswačidle je hižo w februaru ze natwarom škitneje naprawy započała. Tež přirodoškitna stacija wuchodna Hornja Łužica w Mikowje je hižo w februarje amfibijowe płoty nastajiła.
