Powěsće: srjedu, 20.03.2024
Hauptinhalt
20. nalětnika 2024, 22:37 hodź.
Wotrow: Postawa, kiž pozdatnje krawi
Fenomen w priwatnej kapałce we Wotrowje wot zašłeho kónca tydźenja wěriwych zaběra. Sobotu su prěni raz wobkedźbowali, zo je pola postawy Maćerje Božeje na hłowje Jězusdźěćatka hdys a hdys čerwjena substanca widźeć. Biskopstwo Drježdźany-Mišno zdźěli na naprašowanje, zo je wo tym informowane a we wuskim kontakće z cyrkwinskimi zamołwitymi na městnje. Rěčnik biskopstwa dale - citat: "Katólska cyrkej je při posudźowanju tajkich fenomenow wědomje wosebje skedźbliwa. Aktualnje so wuraznje potrjeba k jednanju njewidźi . Biskopstwo prosy wo to, tuchwilu so pohódnoćenjow a nabožnych interpretacijow fenomena wzdać. Wjele bóle maja so wobstejnosće najprjedy raz wěcownje dale wobkedźbować. Jeli trjeba, móža so pozdźišo dalše přepytowanja a analyzy přewjesć. Tuchwilu biskopstwo k tomu wuraznje žanu přičinu njewidźi." Postawa swjateje Marije z Jězusdźěćatkom bu před pjeć lětami w Medjugorju kupjena a steji za kruće přišrubowanej lěsycu. Kapałku na Lipicy wopyta tuchwilu wšědnje tójšto ludźi z wjacorych wosadow. Wotrowčenjo so tam hač do martrowneho tydźenja wječor róžowc modla.
Bruneck: Dalše zetkanje mjeńšinowych dźiwadłow
Skupina Budyskich dźiwadźelnikow a někotři z režijoweho teama inscenacije ""Na tamnym boku měsačka" podadźa so srjedu do města Bruneck w Južnym Tirolu. W tamnišim měšćanskim dźiwadle předstaja sceniske wurězki z aktualneje inscenacije - a to w serbskej, němskej a ladinskej rěči. Na mjezynarodnym mjeńšinowym projekće wobdźěla so nimo Němsko-Serbskeho ludoweho dźiwadła a měšćanskeho dźiwadła w Brunecku tež cyłki z nižozemskeje Friziskeje, Bretoniskeje, Irskeje, Norwegskeje a Španiskeje. Zhromadne akcije maja mnohotnosć kultury a rěče spěchować a zawěsćić a narodne mjeńšiny zwjazać.
Pančicy-Kukow: Nowinki ze Zarjadniskeho zwjazka
W gmejnach zarjadniskeho zwjazka "Při Klóšterskej wodźe" je ilegalne parkowanje dale problem. Tole wobkrući předsyda Stefan Anders wutoru na zhromadźiznje zarjadniskeho zwjazka. Wón a jeho sobudźěłaćerjo w zašłych měsacach tajke přeńdźenja zaměrnišo kontrolowachu. Při tym nazběrachu dotal něhdźe 500 EUR pokuty za wopačne parkowanje awta. Anders wuzběhny, zo pak mnozy šoferojo zmylk njedowidźa. Wosebje na statnej droze w Pančicach-Kukowje je ilegalne parkowanje na chódniku přiběracy problem. Tam chcedźa tež w přichodźe kontrolować a přeńdźenja pochłostać.
Wojerecy: Dom za azylowych požadarjow zawru
Dom za požadarjow wo azyl we Wojerecach na Liselotte Hermannowej droze so kónc apryla po planje zawrěje. Potrjechene je 100 ludźi, kotřiž přećahnu nětko pak do decentralnych pak do druhich domow. Kaž zdźěli krajnoradny zarjad, bydli tuchwilu něhdźe 1.700 požadarjow wo azyl w Budyskim wokrjesu. Nimo tutych je dalšich 300 ludźi, kotřiž maja hižo prawo tu wostać, w přebywanišćach w Budyšinje, Kamjencu a Wojerecach na Dillingerowej droze.
Radwor: Budyska župa z towarstwami a skupinami w rozmołwje
Čłonojo župneho předsydstwa “Jan Arnošt Smoler” zetkachu so wutoru w Radworju z předsydami Domowinskich skupinow a towarstwow župy. Přeprošeni zastupjerjo cyłkow rysowachu aktualnu situaciju w swojich skupinach, wosebje swójbne poskitki so derje přiwzaja, tak prajichu. Z boka župy rěkaše, zo maja so rěčne rumy tworić za wšitke generacije, zo su móžnosće serbsce rěčeć za wuknjacych tež zwonka šule.
