Powěsće: pjatk, 22.03.2024
Hauptinhalt
22. nalětnika 2024, 10:49 hodź.
Wotrow/Chrósćicy: Serbscy blidarjo a klepotawki
Serbscy blidarjo drjewjane klepotawki runje nětko w dojutrownym času we wjetšim mnóstwje zhotowja. Wotrowska Wjenkec blidarnja poskići dwě wulkosći z klona abo mahagonijoweho drjewa. Na dźesać klepotawkow su hižo předali. Podobnje w Cyžec blidarni w Njebjelčicach: Tobias Cyž prěnje skazanki hižo wotdźěła. Wokoło dźesać klepotawkow kóždolětnje zhotowi. A tež pola Krawžic w Chrósćicach su so prěnje hižo kupili. Tež tam Jan Krawža někak dźesać wob lěto twari. Wulki pjatk a ćichu sobotu na někotrych wsach Hornjeje Łužicy dźěćina klepotać chodźi - dokelž zwony njezwonja.
Worklecy: Wyša šula wukwartěruje so do knježeho domu
Za čas přetwara wyšeje šule we Worklecach wukwartěruje so tuta do tamnišeho knježeho domu, tak wobzamkny štwórtk gmejnska rada jednohłósnje. To je po kalkulaciji financielnje najznjesliwiša opcija. Twarske dźěła na wyšej šuli maja so najzašo w nazymje započinać. Njejasny je dotal hišće hospodarski plan za lěto 2024, wot kotrehož wotwisuje tež financowanje přetwara šule. Přez zwyšenje dawkowych a pěstowarskich přinoškow ma so hospodarski plan nastajić a w krajnoradnym zarjedźe zapodać, přez čož móhło so financowanje doskónčnje schwalić.
Ralbicy-Róžant: Nowinki z gmejny
W Šunowje ma so přepławjenska hrjebja Klóšterskeje wody wot fabriki hač do srjedź wjeski rekultiwěrować a wutwarić. Wotpowědny nadawk k planowanju je gmejnska rada Ralbicy-Róžant na swojim posedźenju štwórtk přepodała na firmu Stowasser z Radebeula, kotraž je hižo koncept za wobhospodarjenje wodźiznow 2.rjadu w gmejnje Ralbicy-Róžant nastajiła. Za planowanje naprawy wuda gmejna 14 400 eurow. Projekt ma so lětsa přewjesć, hewak spěchowanske pjenjezy za to spadnu. Wobydlerjo podłu hrjebje a Klóšterskeje wody w Šunowje sej wutwar škita před wulkej wodu hižo dołho wot gmejny žadaja.
Chrósćicy: Z gmejnskeje rady
Niše dochody a wyše wudawki poćežuja gmejnu Chrósćicy při zestajenju hospodarskeho plana za lěto 2024. Tole zhonichu gmejnscy radźićeljo štwórtk na posedźenju gmejnskeje rady.Tak liči gmejna na přikład z minusom 40 000 eurow pola přemysłoweho dawka, porno tomu pak tež ze stupacymi wudawkami za pěstowarnju wo 190.000 euro. Tole wjedźe k tomu, zo liči Chróšćanska gmejna w přichodnych lětach z hoberskim minusom a chce so wjetšich inwesticijow w přichodźe wzdać.
Nowy Miłoraz: Start dźěłow za małe kupanišćo
W Nowym Miłorazu su so prěnje dźěła za twar małeje kupjele započeli. Sabina Ladušowa wot gmejnskeho zarjada rjekny, zo ma basenk ze susodnym sportowym arealom hižo lětsa w lěću hotowy być. Tuchwilu so w srjedźišću wsy hišće na nowych zelenišćach dźěła. W zašłym tydźenju bu přesadźenje zwóńcy zakónčene. Nowa nawjes ma so kónc meje oficialnje přepodać. Miłoraz bu za rozšěrjenje brunicoweje jamy Wochozy přesydlene. Ke kóncej lěta je planowane, zo so kompletne přesydlenje zakónči.
Sorbisches Programm
