Powěsće: sobotu, 23.03.2024
Hauptinhalt
25. nalětnika 2024, 05:23 hodź.
Budyšin: Europska młodźina z hosćom
W Budyšinje zahaji so sobotu jutrowny seminar MENS, Młodźiny europskich narodnych skupinow, kotryž hromadźe ze Serbskim młodźinskim towarstwom PAWK organizuja. Wjace hač 50 młodostnych z 15 europskich narodnych mjeńšinow so hač do Ćicheho pjatka w dźěłarničce z mjeńšinowymi prawami a z tym zwjazanym aktiwizmom zaběra. Njedźelu budu na demonstraciji za demokratiju a pisanosć w Budyšinje z hosćom, póndźelu podadźa so na ekskursiju do brunicoweje jamy a wopytaja kolektiw Wakuum w Choćebuzu. Mjez hosćimi su mjez druhim Bretonojo, Baskičenjo, Walizičenjo, Vlachojo ze sewjerneje Makedonskeje a Madźarojo ze Słowakskeje.
Komunalne wólby: Pola kandidatow SPD za měšćanskej radźe Serbja pódla
Mjez 15 kandidatami SPD za měšćansku radu w Budyšinje staj tež Serbaj nominowanaj. Na dwanatym městnje Tomasz Nawka, (njestronjan), bywši nawoda Serbskeho muzeja a na štyrnatym Benjamin Wirth, produktowy manager. Paritetisce nastajena lisćina nawjeduje so wot předsydki SPD Astrid Riechmannoweje. W Kulowje nastupi SPD ze štyrjomi kandidatami k wólbam měšćanskeje rady, mjez nimi tež serbski wučer Matthias Kliemank, kiž so prěni raz k wólbam staji. Komunalne wólby w Sakskej wotměja so 9.junija.
Chrósćicy: Serbski sejm swoje druhe wólby přihotuje
Serbski sejm swoje druhe wólby wot 18. oktobra hač do 25. januara wotměje, zaso jako listowe wólby. Registrowanje kandidowacych a wolerjow zahaji so hižo w meji. Pjatk je so za to w Chrósćicach wólbny wuběrk schadźował. Wuradźowanje bě zjawne - 15 zajimcow je so přidružiło. Předstajił je so naćisk wólbnych směrnicow. Po nich ma so znowa 12 čłonow sejma z Hornjeje a 12 z Delnjeje Łužicy wolić. Na prěnich wólbach 2018 je so 800 wolerjow wobdźěliło.
Konjecy: Hłowna zhromadźizna hońtwjerskeho drustwa
Za Konječanske hońtwjerske drustwo bě zašłe hońtwjerske lěto dotal najšpatniše. To zdźěli předsyda drustwa, Křesćan Gruhn, po pjatkownišej zhromadźiznje w Konjecach. Přičinje za to stej mjez druhim swinjaca mrětwa a wjelk. Dale tematizowachu přitomni zhromadźizny, zo so přez lěsne dźěła pućiki tak wobškodźa, zo wuchowanske awta hižo k městnu njezboža njepřińdu. Wšitcy, kiž lěsne dźěła přewjedu, su tež za zwuporjedźenje pućow zamołwići.
Sport: Premjera za koparski dorost
Prěni raz wotměje so lětsa spočatk apryla serbski koparski camp. Na nim so 32 dźěći w starobje dźewjeć do dwanaće lět wobdźěli. Młodych sportowcow je trenar Tadej Cyž zhromadnje ze zamołwitymi sportowych towarstwow po jich wukonach w kopańcy nominował. Camp wuhotuje so na třoch městnach: w Njebjelčicach, Ralbicach a w Chrósćicach. Serbske šulske towarstwo koparski camp w kooperaciji z dalšimi akterami organizuje. Koparski camp bě loni mjez mytowanymi namjetami wubědźowanja idejow "Rěč zwjazuje" Załožby za serbski lud.
