Powěsće: wutoru, 26.03.2024
Hauptinhalt
26. nalětnika 2024, 08:03 hodź.
Lipsk: Domowina pola prorektora uniwersity
Studij sorabistiki a wučerstwa serbšćiny na Lipšćanskej uniwersiće ma so kwalitatiwnje přepruwować. Na to dojednachu so póndźelu zastupjerjej Domowiny a zamołwići uniwersity. Personelne rozsudy so žane tworili njejsu. Zetkali su so předsyda Domowiny Dawid Statnik a referentka za kubłanje Katrin Suchec-Dźisławkowa z prorektorom uniwersity a dekanom filologiskeje fakulty, kotrejž Institut za sorabistiku přisłuša.
Budyšin: Šulerski swětowy dźeń dźiwadła
3.000 šulerjow je póndźelu šulerski swětowy dźeń dźiwadła w Budyšinje wopytało. Na 700 wobdźělenych dźěći a młodostnych je na jewišću a za kameru stało. Madleńka Šołćic wot Němsko-Serbskeho ludoweho dźiwadła bilancowaše, zo wobdźěli so 27 skupinow, kiž hrajachu na dźesać wšelakorych jewišćach, w dźiwadle, w ansamblu, w Serbskej wyšej šuli. Program bu zestajany w serbskej rěči, w němskej rěči a tež w němsko-čěskej rěči su hrali. Prěni króć bě tež film zastupjeny. Jedyn ze serbskich wjerškow bě premjera inscenacije "Radoraj" serbskeho dźěćaceho dźiwadła. Dalše serbske předstajenja pokazachu dźěći ze šulow z Wojerec a Pančic-Kukowa.
Janšojcy: Kónc za milinarnju
Milinarnja w Janšojcach zastanje kónc měrca dźěłać. Kaž zdźěli Němska powěsćowa agentura dpa, je tamniša milinarnja jedna wot dohromady sydom po cyłej Němskej, kiž do kónca měsaca milinu produkować zastanu. Poprawom bě kónc milinarnjow hižo zašo připowědźene, energijoweje krizy dla pak su dlěje produkować směli. Ze zakónčenjom zymskeje doby 2023/24 so w Janšojcach blokaj nětko dospołnje zawrějetaj.
Medije: Europske myto mjeńšinowemu dźenikej
Němski mjeńšinowy dźenik w Danskej „Der Nordschleswiger” je prěnje mjezynarodne myto třěšneho zwjazka katalanskich medijow AMIC dobył. Kaž šefredaktor Gwyn Nissen wobkrući, je wón tele dny w Barcelonje “Europske myto za lokalne medije” přijimał. Dóstał je mjeńšinowy dźenik myto, kiž je z 5.000 eurami dotěrowane, za swoje wuwiće wot papjerjaneho dźenika na digitalnu nowinu, kotraž wo wjele wjac ludźi docpěwa hač jenož němsku mjeńšinu w Danskej. AMIC přisłuša wjac hač 700 medijowych předewzaćow. Z nowym mytom chcedźa inowatiwne a angažowane lokalne medije na cyłym swěće počesćić.
Naslědnosć: Solarne připrawy w Budyšinje
W Budyšinje je tuchwilu 643 solarnych připrawow instalowane. Wo tym informuje přirunowanski portal "Selfmade Energy". W poslednim kwartalu 2023 buchu 40 nowych solarnych připrawow w měsće instalowane. To je drje 6,6 procentow wjac hač hišće w kwartalu do toho, přiwšěm pak leži Budyšin hišće pod cyłoněmskim přerězkom, kiž wučinja sydom procentow. Kaž portal dale zdźěli, je wosebje nalětni čas dobra składnosć za nakup solarnych připrawow. To zwisuje z tym, zo maja zawody w zymskim počasu mjenje naprašowanjow a tuž swobodne kapacity.
Wotrow: Nowosće k figurje w kapałce
Za čerwjenu maćiznu, kiž bě před tydźenjom na čole postawy njedaloko Wotrowa widźeć, su prěnje pokazki za móžnu přićinu dóšli. Biskopstwo Drježdźany-Mišnjo je pokiwy dóstało, kiž su přirodneho pochada - a su plausiblne, tak rěčnik biskopstwa. Dokładniše informacije pak njemóža nětko hišće dać. Po jutrach chce biskopstwo rozsudźić, hač da fenomen přepruwować. Mjeztym bě čerwjena maćizna wjacore razy widźeć. Kapałka zapadnje Wotrowa přiwabi wšědnje wěriwych z bliska a daloka.
