Powěsće: póndźelu, 25.03.2024
Hauptinhalt
26. nalětnika 2024, 08:04 hodź.
Budyšin: Poezija za demokratiju
Pod hesłom "Poezija za demokratiju" je so njedźelu popołdnju w Budyšinje na Žitnych wikach na 250 ludźi zetkało. Pódla bě tež Serbske młodźinske towarstwo PAWK z wobdźělnikami jutrowneho seminara Młodźiny europskich narodnych skupin, MENS. Wustupiłoj staj mjez druhim znataj poetry-slameraj, Fabian Kaulfürst je na akordejonje k sobuspěwanju zapiskał, a Lucian Kaulfürst na dudach. Słowa jimali su so młode Budyšanki a tež Krystof Grofa wot towarstwa PAWK a městopředsyda MENS. Moderěrowałoj stej Katja Gerhardi němsce a Judit Šołćina serbsce.
Slepo: Bołmončku w ewangelskej wosadźe
Konfirmandźa Slepjanskeje wosady su na Palmarumje swoje konfirmaciske pruwowanja złožili. Na njedźelnišich dopołdnišich kemšach dyrbjachu před wosadu dopokazać, kak krući we wěrje su a hač su kmani, na prašenja wěrywuznaća wotmołwić. Tak mějachu tež wuhotować dopołdniše kemše w Slepjanskej cyrkwi.
Mały Wjelkow: Nowa sezona w sawrijowym parku
Sawrijowy park w Małym Wjelkowje startuje póndźelu do noweje sezony. Dohromady je Budyska wobdźělenska a wobhospodarjenska towaršnosć (BBB), kiž je nošer parka, 250.000 eurow inwestowała. Tak wočakuja wopytowarki a wopytowarjow nowe atrakcije. Tež kwisowu Safari tam wot dźensnišeho poskićuja. Je to aplikacija za šmóratko, kiž informuje wo 20 wšelakich stacijach. Sawrijowy park je nětko hač do spočatka nowembra wotewrjeny.
Budyšin: Dotalna dojutrowna bilanca jejkadebjenja
Dotalne dźěłarnički za debjenje jutrownych jejkow w Serbskej kulturnej informaciji w Budyšinje je dohromady 50 ludźi wopytało. Nimale wšě běchu wuknihowane a bě wjac naprašowanjow hač městnow. Kaž sobudźěłaćerka SKI dale zdźěli, tuteho nawala dla k planowanej dźěłarničce Ćichu sobotu dalšu přidatnu poskićuja. Tež dalše poskitki, pod fachowym nawodom serbske jutrowne jejka debić, su so derje přiwzali - na přikład w Rownom a Wojerecach. Njedźelu bě tajka móžnosć w Nowej Łuce na jutrownych wikach.
Wojerecy: Prěnje wubědźowanje z trutami
We Wojerecach wotměje so w aprylu prěnje wubědźowanje w lećenju trutow - tak mjenowany Łužiski cup. Wubědźowanje budźe wosebity wobstatk njewšědneje show z trutami we Łužiskej hali we Wojerecach. To zdźěli Peter Pfeiffer wot kompetencneho centruma za awtonomne lětanje. Tež program, kiž kulturu a techniku zwjazuje, je předwidźany. Nimo toho předstaji so wustajeńca ze wšelakimi modelemi trutow. Zarjadowanje přewjedźe so 19. a 20. apryla we Łužiskej hali.
