Powěsće: srjedu, 27.03.2024
Hauptinhalt
28. nalětnika 2024, 08:12 hodź.
Drježdźany: Parlamentariska přirada Załožby za serbski lud wuradźowała
Sakske, braniborske a zwjazkowe knježerstwo měli so tak spěšnje kaž móžno wo pjatym financnym zrěčenju Załožby za serbski lud dojednać. Na to pokaza parlamentariska přirada Załožby za serbski lud wutoru na swojim posedźenju. Nimo toho přeswědčichu so radźićeljo wo tym, zo Zwjazk nadal serbskej załožbje přilubjene přiražki za lětsa płaći. W třećim dypku je so přirada znowa z Ludowym nakładnistwom Domowina zaběrała a žada sej přilubjene zastopnjowanje sobudźěłaćerjow tež přesadźić.
Budyšin: Jutrownu studnju poswjećili
Město Budyšin pyši so za jutry. Tak bu wutoru jutrowna studnja při Tachantskej cyrkwi poswjećena. Podawk wobrubi chór Serbskeje zakładneje šule Budyšin ze serbskimi spěwami. Wyši měšćanosta Karsten Vogt (CDU) witaše na městnje Budyšanow a mnoho hosći do jutrowneho města z wjele tradicijemi a nałožkami. Budyska jutrowna studnja je wupyšena z girlandami, kwětkami a jutrownymi jejkami. Dalše tajke studnje su tež w Kamjencu, Halštrowje a w Slepom.
Łužica: Klanka rěči a wuknje serbsce
Klanka "Lingufino" móže wot nětka tež ryzy serbsce. To zdźěli Marija Unčowa wot Załožby za serbski lud. Wosebite tykački za nju su wot nětka na předań - a to jeničce w Serbskej kulturnej informaciji w Budyšinje. Tak njemóže pleńčatko jenož serbsce z dźěsćom rěč nawuknyć, ale z wužiwarjom tež ryzy serbsce rěčeć. "Lingufino" bu 2022 prěni raz předstajene a z toho časa bu 50 z nich w serbskich pěstowarnjach wuspytane. Klanka so ze swojimi stawizničkami, serbskimi bajkami a dźěćacymi spěwami kaž tež hódančkami a paćerkami derje přiwza. Tohodla bu dalši, ryzy serbski modul, wuwity.
Wojerecy: Z měšćanskeje rady
We Wojerecach wotewri po jutrach tak mjenowany "labor k sobuskutkowanju" k temje strukturna změna. Planowane su mjez druhim informaciske a kubłanske projekty, kiž so ze slědźenjom zaběraja. Projektowi partnerojo města Wojerecy su TU Drježdźany, Łužiski technologiski centrum Lautech a Němski centrum za astrofyziku. Labor k sobuskutkowanju je w něhdyšim Wojerowskim hosćencu "K wódnemu mužej" zaměstnjeny a wotewri 2. apryla prěni raz swoje wrota.
Rowno: Hotuja so na jutrowne spěwanje
W Slepjanskej wosadźe přihotuja so na jutrowne spěwanje, kiž wotměje so lětsa jeničce w Rownom. Někotre žony a holcy skupiny "Rowniske glosy" a ze Slepjanskeho folklorneho ansambla za to prawidłownje zwučuja. Wone hotuja so na to, zo bychu jutrownu nóc wot połnocy hač do ranja šesćich spěwajo dwór wot dwora ćahnyli a naposledk na Njepilic dworje słónco witali. Samsna skupinka hižo Zeleny štwórtk nutrnosć w Slepjanskej cyrkwi sobu wuhotuje.
