Powěsće: sobotu, 20.04.2024
Hauptinhalt
20. jutrownika 2024, 10:00 hodź.
Budyšin: Krajny biskop Bilz Domowinu a SET wopytał
Krajny biskop ewangelsko-lutherskeje cyrkwje Sakskeje Tobias Bilz je so pjatk ze serbskimi zastupjerjemi zetkał. Na rozmołwje ze serbskim superintendentom Chrystofom Rummelom a předsydu Serbskeho ewangelskeho towarstwa Matom Krygarjom w Serbskim domje w Budyšinje informowaše předsyda Domowiny Dawid Statnik wo Serbach a rěčnych rumach. Wón kaž tež dalši přitomni skedźbnichu na to, kaž wažne su nimo šule a swójby towarstwa a cyrkwje za zachowanje serbskeje rěče. Zajimował je so krajny biskop mjez druhim za rěčne projekty we wobłuku strukturneje změny we Łužicy. Rozmołwa nasta na iniciatiwu Budyskeho superintendenta Tillmanna Poppa.
Choćebuz: Njezrozumjenje za wólbne plakaty
W Delnjej Łužicy postara so plakat AfD za komunalne wólby 9. junija wo protesty. Strona wabi za wólby do Choćebuskeje měšćanskeje rady z plakatom, na kotrymž su Delnjoserbowki w serbskej swjedźenskej drasće widźeć a pod tym němske hesło "naše wsy su pisane dosć". Domowina w Delnjej Łužicy wupraja so raznje přećiwo tomu a wšitkim zjawam, hdźež so serbske herbstwo znjewužiwa a instrumentalizuje, zo bychu so druzy z towaršnosće wustorčili. "Nochcemy być redukowani na narodnu drastu, widźimy našu rěč a drastu jako cyłk", zdźěli regionalna rěčnica Domowiny za město Choćebuz Karin Tšukowa.
Wulke Zdźary: Jězor wostanje dale zawrjeny
Hórnikečanski jězor wostanje saněrowanskich dźěłow dla znajmjeńša hač do lěta 2030 zawrjeny. To připowědźi zastupnik hórnistwoweho saněrowarja LMBV na minjenym wuradźowanju měšćanskeje rady w Kulowje. Kaž tam dale rěkaše, su mjeztym wulke dźěle jězora, mjez druhim tež při Mučowskim přibrjohu hotowe. Nětko chcedźa so na saněrowanje dźěla přibrjoha wěnować, hdźež bě 2021 k wulkim zesuwanjam dóšło. Wot klětušeho tam z ćežkej techniku zemju zhusćeja. 2028 chcedźa potom pruwować, hač móža dźěle jězora zaso zjawnosći přewostajić. Saněrowanje Hórnikečanskeho jězora płaći cyłkownje něhdźe 165 milionow eurow.
Łaz: Namrěwstwo Zejlerja dale pěstować
We Łazu chcedźa Handrija Zejlerjowe namrěwstwo dale pěstować. To wuzběhny pjatk čłon předsydstwa Spěchowanskeho towarstwa Zetkanišća domu Zejlerja a Smolerja Łaz, Reinhardt Schneider na hłownej zhromadźiznje. Dohromady šěsć wjedźenjow po wustajeńcy móžeše so loni přewjesć. Nimo toho planowachu lětuše wjerški. Tak chcedźa sej kónc awgusta do Złeho Komorowa do tamnišeje likeroweje fabriki dojěć. Towarstwo wobsteji mjeztym 30 lět a ma na 40 čłonow.
Kultura: Wosebity ćah znowa po puću
Wot pjatka je zaso kulturny ćah po Hornjej Łužicy po puću. Kaž Němska železnica zdźěli, zastanje tutón na swojim puću z Berlina do Wrócławja tež w Běłej Wodźe a Choćebuzu. Hač do srjedź decembra je kulturny ćah nětko kóždy kónc tydźenja po puću. Pasažěrojo móža čas za přebytk we Wrócławju wužiwać. Dwě hodźinje ma wot Běłeje Wody hač do Wrócławja po puću być. Tikety płaća tež w busach a tramwajkach we Wrócławskim měšćanskim wobchadźe jako dnjowy lisćik.
