Powěsće: wutoru, 23.04.2024
Hauptinhalt
23. jutrownika 2024, 12:46 hodź.
Zarjadniski zwjazk: Chodojtypalenje so přihotuje
Na teritoriju zarjadniskeho zwjazka "Při Klóšterskej wodźe" je dotal dohromady 22 wohenjow za 30. apryl přizjewjene. Kaž rjekny nawoda Stefan Anders, ma so kóždy woheń, tež hdyž je na priwatnej ležownosći, w zarjadniskim zwjazku přizjewić. We Worklečanskej gmejnje smědźa so hałuzy wot tuteho tydźenja na znate městna w Smječkecach, Nowej Wjesce, Wudworju a Worklecach přiwjezć. W gmejnje Chrósćicy je to hakle wot pjatka a w Pančičanskej gmejnje wot soboty móžne. Tam kontroluja wobornicy wot 8 do 16 hodź., što so na chodojty wozy a što je zakazane – kaž meble, barby abo wobruče. Gmejna Njebjelčicy je hižo zašłu sobotu hałuzy hromadźiła a čini to hišće raz přichodnu sobotu – a to na znatych městnach; jeničce w Miłoćicach hišće prawy blak pytaja, tak nawoda zarjadniskeho zwjazka Stefan Anders wobkrući.
Wojerecy: Dźeń wobswěta a Europy na farmje
Na dźěćacej a młodźinskej farmje we Wojerecach, kotraž je w nošerstwje Křesćansko-socialneho kubłanskeho skutka Sakska, je so póndźelu europski a wobswětowy swjedźeń wotměł. Za lěpše zhromadne dźěło podpisaštaj jednaćel CSB Marko Kliman a jednaćel Měšćanskich hospodarskich zawodow SWH Thomas Bleier kooperaciske zrěčenje. Dopołdnja běchu šulerki a šulerjo dźesatych lětnikow Wojerowskich šulow na powołanske wiki přeprošene. Nimo toho móžachu so na šěsć stejnišćach k wšelakim temam wokoło wobswěta informować a tež aktiwnje sobu skutkować. 300 zajimcow bě přišło.
Berlin: Program "Łužiskeho festiwala" předstajili
Lětuši "Łužiski festiwal" tematizuje strukturnu změnu. Na 60 koncertow, dźiwadłowych předstajenjow a wustajeńcow je wot kónc awgusta do srjedź septembra planowane. Wysoko dotěrowany program předstajichu zamołwići póndźelu w Berlinje. Serbski podźěl koncentruje so na dwurěčne čitanje w Budyšinje. Gabriela Šmajdźina a dalši dźiwadźelnicy čitaja w Budyskim Němsko-Serbskim ludowym dźiwadle z tekstow, mjez druhim Jurja Kocha, Róže Domašcyneje, Kita Lorenca a Bena Budarja.
Choćebuz: Město dóstanje medicinsku uniwersitu
Łužica dóstanje medicinsku uniwersitu w Choćebuzu. Wo tym je statna kenclija Braniborskeje póndźelu informowała. Wutoru plany kabinetej předstaja. W zymskim semestrje 2026/27 je start. Jako jenička medicinska uniwersita Němskeje změje jako ćežišćo slědźenje strowotniskeho systema a ma so zaběrać z tym, kak móže so ludnosć na kraju najlěpje strowotnisce a hladarsce zastarać. Łužica budźe z tym modelowy region za cyłu Němsku.
Smochćicy: Zwjazkowa konferenca dušepastyrjow
W kubłanišću swj. Bena w Smochćicach zetkawaja so w tutym tydźenju jastwowi dušepastyrjo z cyłeje Němskeje. Tež hosćo ze Šwicarskeje, Nižozemskeje, Madźarskeje, Šwedskeje a Francoskeje su na městnje. W srjedźišću 75. zwjazkoweje konferency steji wobchadźenje z psychisce chorymi ludźimi w jastwje. Nimo toho poskićeja so we wobłuku schadźowanja wšelake ekskursije. Po cyłej Němskej je na 300 dušepastyrjow w dohromady 200 jastwach zasadźene.
Hornja Łužica: Ćećorki zaso zasydlić
Znowazasydlenje ćećorki, němsce Birkhuhn, ma w Zhorjelskej wokolinje najebać wjelka šansu. To dopokazuja nazhonjenja z Pólskeje, hdźež maja hišće sylniše populacije wjelka hač mamy je my we Łužicy. Po słowach Thomasa Brückmanna wot krajneje załožby za přirodu a wobswět běchu pak ćećorki tam z wosebitym płotom škitane. Před 30 lětami tute ptaki, kiž słušeja do družinoweje swójby bažantow, hišće w Hornjej Łužicy sydlachu. Dla jamy we Wochozach pak zhubichu swój žiwjenski rum. Z rekultiwaciju maja so ćećorki znowa zasydlić.
