Powěsće: srjedu, 24.04.2024
Hauptinhalt
24. jutrownika 2024, 12:00 hodź.
Hornja Łužica: Mortwe wjelki
W Hornjej Łužicy je ličba ilegalnje morjenych wjelkow stupała. To zdźěli krajny kriminalny zarjad. W zašłych 12 měsacach buchu tři wjelki w Budyskim a jedyn w Zhorjelskim wokrjesu zatřělene abo zajědojćene. To su jeničke morjene wjelki po cyłej Sakskej, kaž je dotal znate. Krajny kriminalny zarjad pady nětko přepytuje. Nimo toho wuchadźa z toho, zo je njeoficialna ličba morjenych wjelkow wyša. Dale warnuje zarjad wobsedźerjow psow před jědojtymi wabjenkami, kiž móhli w lěsu ležeć.
Mjeńšinowa politika: Žadanja FUEN do europskich wólbow
Europska unija dyrbi dźěłowu skupinu za tradicionalne narodne mjeńšiny w Europskim parlamenće wožiwić. To žada sej Federalistiska unija europskich narodnych mjeńšin FUEN. Kaž mjeńšinowy zwjazk, kotremuž přisłuša tež Domowina, njedawno wozjewi, ma tajke žadanja za trěbne, dokelž EU žanu wobšěrnu mjeńšinowu politiku nima. Dale žada sej FUEN fachowcow mjeńšinoweho prawa zasadźić, kiž Europsku komisiju poradźuja, normy za škit narodnych mjeńšinow wobzamknyć, kaž tež skutkowny kontrolny mechanizm k jich dodźerženju.
Lubnjow: Prezidij Domowiny so schadźował
Prezidij Domowiny je so wutoru na swojim posedźenju w Lubnjowje mjez druhim z wólbnymi kopolakami za wólby krajneju sejmow Sakskeje a Braniborskeje zaběrał. Třěšny zwjazk je so na dźesać prašenjow dorozumił, kotrež so nětko politiskim stronam sposrědkuja. Wólbne kopolaki měrja so na přikład na kubłanske naležnosće abo wužiwanje serbšćiny na digitalnym polu. Ručež wotmołwy předleža, Domowina je wozjewi.
Malešecy: Etat 2024 schwalili
Gmejnska rada Malešecy je wutoru lětuši etat we wysokosći 9,2 milionaj eurow wobzamknyła. Z toho je jedyn milion za inwesticije. Jedyn z twarskich projektow je, zo saněruje so w šulskim muzeju w Stróži hornja etaža. Tam nastanje z něhdyšeho bydlenja rumnosć za zarjadowanja, štož płaći 100.000 eurow a ma hač do lěća hotowe być. Zo pak by hospodarski plan wurunany był, dyrbja lětsa prěni raz 1,2 milionaj eurow z rezerwy brać.
Hodźij/Radwor: Zastup bjez barjery do cyrkwje
Ewangelska wosada w Hodźiju, kaž tež katolska wosada w Radworju, dóstanjetej kóžda 25.000 eurow, zo byštej móhłoj bjezbarjerny přistup do cyrkwje zmóžnić. Staj to dwaj wot 16 projektow, kiž Budyski wokrjes lětsa ze sakskimi pjenjezami programa "Najlubše blečki za wšitkich" kompletnje zapłaći. Wšitke spěchowanja za bjezbarjernosć je krajny rada Udo Witschas wutoru přepodał.
