Powěsće: štwórtk, 25.04.2024
Hauptinhalt
25. jutrownika 2024, 08:38 hodź.
Lubnjow: Zeńdźenje dźěłoweho zjednoćenstwa
W błótowskim Lubnowje je so srjedu třidnjowske zeńdźenje dźěłoweho zjednoćenstwa europskich narodnych mjeńšin zahajiło, kotrež nimaja žadyn maćerny kraj. Při tym stej so hłownje Domowina a serbske žiwjenje we Łužicy předstajiłoj. Viceprezident FUEN, Bahne Bahnsen, zjimaše wobšěrnu prezentaciju ze sadu: „Serbja njesonja, ale radšo činja!“ Dalša tema bě turizm w Błótach. Zastupjerjej Ladinow w Južnym Tirolu a Sewjernych Frizow pak warnowaštaj před zdźěla bolostnymi sćěhami turizma na rěč a kulturu mjeńšinow.
Hornja Łužica: Znowa stawk móžny
Znowa hrozy stawk wjacorych busowych předewzaćow wot pjatka tež w Hornjej Łužicy. Hdyž dźěłodawarjo hač do štwórtka připołdnja kmany poskitk njepředpołoža, tomu tak budźe, připowědźi ver.di. Dźěłarnistwo chce za busowych šoferow we wokrjesach podobne tarifowe wotzamknjenje, kaž maja je we wulkich městach, wuwojować. Wot njewobmjezowanych stawkow móhli potrjechene być: busy Wojerowskeje wobchadneje towaršnosće a regio-busy Hornjeje Łužicy. Stawk móhł tež zaso busowe čary do serbskich šulow potrjechić.
Budyšin: Chorownja rozšěri poskitk
Hornjołužiske kliniki w Budyšinje chcedźa swój strowotniski a hladanski poskitk rozšěrić. Sakski statny minister za regionalne wuwiće, Thomas Schmidt, je srjedu wotpowědny spěchowanski šek z wjace hač 3,7 milionow eurow přepodał. Nastać ma stacionarny dom za hladanje starych a chorych. Kaž praji jednaćel chorownje, Jörg Scharfenberg, nastanje z nowym poskitkom 54 hladanskich a 30 dźěłowych městnow. Nětko dyrbja so najprjedy raz stare dźěle domskeho zdźěla zwottorhać a přetwarić.
Kultura: Filmowy festiwal ze serbskim ćežišćom
Jedne z ćežišćow lětušeho 21. Filmoweho festiwala Nysa su Serbja. Kaž zamołwići w nowinskej zdźělence informuja, je lětuši program z hesłom "serbska krajina" popisany. Mjez druhim tematizuja so identita, stereotypy a róla Serbow w němskej filmowej industriji. Filmowy festiwal Nysa wotměje so lětsa wot 14. do 16. meje. Něhdźe 90 filmowych produkcijow su so lětsa wuzwolili. Tute pokazaja so w 19 wšelakich kinach a zarjadnišćach.
Domowina: Namjety zapodać
Domowina chce lětsa zaso wosoby abo skupiny, kiž so čestnohamtsce za zdźerženje rěče a hajenje serbskeje kultury na wosebite wašnje angažuja, wuznamjenić. To pisa třěšny zwjazk Serbow srjedu w nowinskej zdźělence. Wot nětka hač do kónca junija móža so mytowanskemu wuběrkej namjety za Myto Domowiny, Myto Domowiny za dorost a za Čestne znamješka Domowiny zapodać. Mytowanske zarjadowanje wotměje so srjedź oktobra w Budyšinje.
