Powěsće Serbskeho rozhłosa
Hauptinhalt
20. požnjenca 2024, 23:35 hodź.
Čorna Pumpa: Pjenjezy za zastaranje z pitnej wodu dóstali
Zo by Łužica po wudobywanju brunicy nadal spušćomnje z pitnej wodu zastarana była, planuje Łužiski wodowy zwjazk twar awtarkneju připrawow za zwyšenje ćišća w industrijowym parku Čorneje Pumpy a nowotwar dalokowodow. Kaž zwjazk zdźěli, chce hač do 2026 něhdźe 15 milionow eurow do zastaranja z wodu w braniborskej a sakskej Łužicy inwestować. Projekt móže so přewjesć, dokelž jón Němska z pjenjezami za strukturnu změnu podpěra. K tomu su štwórtk oficialne připrajenje dóstali.
Budyšin: Čmjeła Hana zaso wotlećała
Dźiwadłowe předstajenje za dźěći "Čmjeła Hana wočakuje wopyt" měješe štwórtk w Budyskej pěstowarni w Strowotnej studni swoju premjeru, dalše předstajenje bě w Malešecach. Čmjełu hraje lětsa elewka Bernadet Šnajdrec. Dźiwadźelnik Měrko Brankačk je hru napisał a tež režiju wjedł. Jemu je při hraću napadnyło, zo je serbskorěčna kompetenca dźěći so w zašłych lětach we woběmaj pěstowarnjomaj polěpšiła. Po premjerje doleći sej "Čmjeła Hana" w Serbach hač do kónc měsaca do dźewjeć dalšich pěstowarnjow a zakładnych šulow.
Minakał: Bombu namakali
W Minakale su štwórtk 100 kilogramow ćežku bombu znješkódnić dyrbjeli, kotruž su při twarskich dźěłach namakali. Po informacijach krajnoradneho zarjada Budyšin su wobydlerjow w radiusu jednoho kilometra wokoło namakanišća ewakuowali - potrjechiło je to ludźi z Minakała a dźěle susodneje wsy Hat (němsce: Teicha). Woni buchu z busami mjez druhim do wokolnych sportowych halow dowjezeni. Wječor su so domoj nawróćić móhli.
Worklecy: Hrajkanišća w gmejnje nastawaja
We Worklečanskej gmejnje nastawaja dale hrajkanišća. W Nowej Wjesce je wone nimale dotwarjene. To praji wjesnjanosta Worklečanskeje gmejny, Clemens Poldrack, na zašłym posedźenju tamnišeje gmejnskeje rady. Tež we Wudworju twar hrajkanišća přez wjesny cyłk derje pokročuje. Dotwarjene a za zjawnosć wotewrjene je wotnětka hrajkanišćo w Smječkecach. Tam je wjesne towarstwo projekt organizowało a zrealizowało.
Załom: Nowa gravelbikowa čara
W Załomju je je so štwórtk nowa čara za kolesowanje wotewriła. Wona je wobstatk tak mjenowaneje gravelbikoweje ruty, kiž zwjazuje turistiskej regionje Sakska Šwica a Hornja Łužica/Žitawske horiny. Dohromady je čara 320 kilometrow dołha. Wotrězk pola Załomja podpěra Sakska z 210.000 eurami. Sakska chce so z jednej z najlěpšich kónčinow za krosnowanske kolesowanje po cyłej Europje stać. W tym zwisku přewjedźe tuchwilu tež studiju ke kolesowarskemu turizmej.
