Powěsće Serbskeho rozhłosa
Hauptinhalt
23. jutrownika 2025, 16:35 hodź.
Ralbicy: Dźěći do noweje pěstowarnje přećahnyli
W Ralbicach móžachu wutoru dźěći pěstowarnje a žłobika zhromadnje do noweje "Serbskeje pěstowarnje w Delanach" zaćahnyć, tak nawodnica kubłanišća Jadwiga Nukowa. W awgusće 2023 běchu po pjećlětnej planowanskej fazy zakładny kamjeń połožili. Cyłkowny projekt wobsahuje nimo nowotwara pěstowarnje zdobom přetwar stareje pěstowarnje na hort. Žłobik w Smjerdźacej so z tym zawrěje. Nowe kubłanišćo skića 155 dźěćom městno. Projekt płaći dohromady něhdźe dźewjeć milionow eurow, 90 procentow z toho so spěchuje. Oficialne přepodaće twara chcedźa 23. meje z nalětnim swjedźenjom a mejemjetanjom zwjazać, tak wjesnjanosta gmejny Ralbicy-Róžant Hubertus Ryćer.
Róžant: Dźakna Boža mša křižerjow
Něhdźe 500 křižerjow, zdźěla ze swójbnymi, je wutoru wječor w Róžeńće dźakne kemše swjećiło. Hłowny celebrant běše farar Sćěpan Delan z Ralbic, prědował je kapłan Florian Mróz z Roma. Mjez druhim rěčeše wo spěšnych powěsćach a nowosćach w dźensnišim swěće a kak tute wšědny dźeń wobwliwuja. Na pišćelach hraješe Bernadet Šołćina. Serbski rozhłós je po zwučenym wašnju kemše w radiju a w interneće wusyłał.
Njechorń: W domje Měrćina Nowaka hosći witali
Dobru rezonancu je přećelski kruh doma Njechorńskeho dožiwił, jako jutrownu póndźelu twarjenje zjawnosći wotewri. Wjac hač 50 ludźi wuži popołdnju składnosć, sej wot Floriana Kießlicha domske a wustajeńcu pokazać dać. Na dźesać čłonow přećelskeho kruha so na městnje tež wo ćělne derjeměće staraše. Hosćo přichwatachu z wokolnych wsow kaž tež z Drježdźan. Nimo bjesady móžachu woni tež wóskowanju jutrownych jejkow přihladować. Kaž Florian Kießlich zdźěli, přemysluje přećelski kruh wo tym, tajke zarjadowanja prawidłownje poskićeć. Srjedu wopytaja dźěći experiMINT campusa z Radworja dom molerja Měrćina Nowaka w Njechornju.
Budyšin: Dale dźe z Wjesołej póndźelu w Budyšinje
Rjad zarjadowanjow "Happy Monday - Wjesoła póndźela" ma wot přichodneje póndźele w Budyšinje pokročować. Je to dźěl projekta "Demokratisce angažowany w Budyšinje". Tutón so wot Zwjazkoweho ministerstwa za swójby, seniorow, žony a młodźinu spěchuje. Na połsta towarstwow a organizacijow format zhromadnje wuhotuje. Tež Domowina a Rěčny centrum Witaj stej pódla, staratej so mjez druhim wo serbski podźěl. Tuchwilu pytaja hišće za dalšimi serbskimi dobrowólnymi, kiž maja ideje a lóšt, so wobdźělić, tak sobuiniciatorka Manja Gruhnowa. Póndźelu so lětuši rjad na Hłownym torhošću wotewri a za kóždu póndźelu w meji planuja zarjadowanja.
Ralbicy: Serbski koparski camp za dorost
W Ralbicach zahaji so srjedu serbski dorostowy koparski camp w starobnymaj klasomaj młodźiny D a E. Na planje třidnjowskeho zetkanja steji za 40 dźěći koparski trening, fitnesowe jednotki kaž yoga a dalše ćěłozwučowanja. Štwórtk popołdnju je nimo toho planowany koparski turněr. Za to přijědźetej dorostowe mustwo Budissy Budyšin a mustwo z Wojerec do Ralbic, praji Tadej Cyž, kiž lěhwo hromadźe z Michaelu Rabowej nawjeduje. Organizator koparskeho campa je Serbske šulske towarstwo.
