Powěsće Serbskeho rozhłosa
Hauptinhalt
09. winowca 2024, 11:36 hodź.
Hornja Łužica: Za dźewjeć měsacow serbsce rěčeć!
Syć za serbsku rěč ZARI startuje intensiwny program "Domoj", z kotrymž maja wobdźělnicy šansu, za dźewjeć měsacow běžnje hornjoserbsce rěčeć nawuknyć. Wutoru wozjewichu w socialnych syćach namołwu, so hač do 11. nowembra wo jedne z 12 městnow w prěnim kursu powabić. Start kursa je w februarje. Za połne wobdźělenje je stipendij móžny. Za ludźi, kiž w serbskorěčnej wokolinje dźěłaja, je tež podźělne wobdźělenje móžne, ale bjez stipendija. Nimo wšědneho wuwučowanja w "rěčnym hnězdźe" su přednoški, wulěty, praktikum a zaběra ze swójskim projektom předwidźane.
Njeswačidło: Nowostki z gmejny
W Njeswačidle je gmejnska rada wutoru etat za lěće 2024/25 wobzamknyła, byrnjež wón ani wurunany njebył. To drje rěka, praji wjesnjanosta Gerd Schuster, zo budźe krajnoradny zarjad dalše lutowanja namjetować. Tute pak su po měnjenju wjesnjanosty lědma hišće móžne, dokelž je gmejna w zašłych lětach hižo dosć lutować dyrbjała. Nimo toho dźěše wutoru wo Njeswačansku tankownju. Byrnjež wona dawno hižo zawrjena była, su na přikład hišće wšitke tanki w zemi. Nětko chce so gmejnski zarjad wo zrumowanje areala starać.
Budyšin: Digitalny muzej Njechorńskeho
W nadawku Załožby za serbski lud nastawa tučasnje w Budyskim studiju "Lucija" digitalna prezentacija muzeja Měrćina Nowaka-Njechorńskeho. Myslena je tuta po słowach Michała Cyža za wužiwarjow tak mjenowanych VR-nawočow, z pomocu kotrychž móžeš muzej potom wirtuelnje wopytać. Nimo Michała Cyža wobdźěli so na projekće šuler 10. lětnika z Worklec, Kilian Bjarš. Po nazymskich prózdninach ma digitalna werzija serbsce, čěsce a němsce předležeć.
Narodne mjeńšiny: "Liet international" ze serbskim wobdźělenjom
Lětuše spěwne wurisanje w mjeńšinowych rěčach "Liet international" změje po wjelelětnej přestawce zaso serbski poskitk. Kaž rozprawja delnjoserbski rozhłós, bu Lena Hauptmannojc na finale 22. nowembra na kupu Korsika přeprošena. Tam předstaji so wona z produkciju delnjoserbskeho rozhłosa RBB "Co by nadejšła". Na dotal 13 wubědźowanjach "Liet international" běchu Serbja jenož dwójce zastupjene – 2003 ze skupinu Awful Noise a w lěće 2004 z Istvánom Kobjelu.
Wokrjes Budyšin: Prěni pad chorosće módreho jazyka
Krajnoradny zarjad Budyšin namołwja wobsedźerjow wowcow, kozow a howjadow, swoje skoćata dokładnje wobkedźbować: we wokrjesu su prěni pad chorosće módreho jazyka zwěsćili. Po informacijach zarjada bu chorosć pola wowcy w sewjeru wokrjesa dopokazana. Dalši podhlad pola howjadow so hišće přepytuje. Wobsedźerjo skotu njech podhladne pady nablaku weterinarnemu hamtej wozjewja. Potrjechene skoćata njechaja žrać a maja zymicu, w ćežkich padach móža zahinyć. Wirus, kotryž wěste kuntwory přenjesu, je so z lońšeho oktobra razantnje w Němskej rozpřestrěł. Za čłowjeka pak je njestrašny.
