Jan Tejpel
Hauptinhalt
01. nalětnika 2011, 09:46 hodź.
Što dokładnje činju? Sym w Budyskim studiju MDR a pola Serbskeho rozhłosa za wšitke techniske prašenja zamołwity. Zawěsću wšitke techniske wotběhi wusyłanjow, produkcijow a přenjesenjow zwonka studija. Staram so tež wo to, zo maja wšitcy, kiž tu w studiju dźěłaja, stajnje optimalne techniske dźěłowe wuměnjenja. Dale mam na starosći ćeže pola zawjedźenjow a změnow techniki abo software spóznać a wuporjedźeć.
Narodźił sym so 2. oktobra 1975 w Budyšinje. Wotrostł w Bukecach a we Wuježku.
Moje wukubłanje: Dokelž sym sej při njezbožu koleno skóncował, njejsym wjace móhł swoje prěnje powołanje jako blidar wukonjeć. A dokelž bě naš nan wučer informatiki, sym so hižo jako hólčec jara za kompjuterowu techniku zajimował a so z njej zaběrał. Tuž sym so spěšnje za nowe powołanje rozsudźił. Wot lěta 2002 sym fachowy informatikar za nałožowanske wuwiwanje (programěrowar) a sym w slědowacych lětach wjele kwalifikacijow za syćowu a serwerowu techniku docpěł, tak zo sym wot lěta 2010 tež administrator a systemowy inženjer.
Wot kónca 2010 skutkowach jako systemowy administrator za MDR w Drježdźanach a mějach tuž wjele kontakta z kolegami a sobudźěłaćerkami radija a telewizije. Wot 2019 staram so nětko wo Budyske regionalne studijo.
Moje moto: "Wšitke techniske zmylki maja logiski pozadk, kotryž hodźi so systematisce a woměrje přeco namakać. Tuž, žanu paniku, njedawa ničo, štož so rozrisać njeda."
